اسلام آباد میں تحریک انصاف کے پرتشدد احتجاج کے دوران زخمی ہونے والے ایس ایچ او طاہر اقبال کا کہنا ہے کہ تمام مظاہرین آتشی اسلحہ سے لیس تھے جبکہ پولیس انہیں بغیر اسلحہ کے کنٹرول کرنے کی کوشش کر رہی تھی۔
ایس ایچ او تھانہ نیو ائیرپورٹ طاہر اقبال نے اپنے بیان میں کہا کہ 24 نومبر 2024 کو میں لا اینڈ آرڈر کیلئے موٹروے پر تعینات تھا، رات تقریباً 11 بجے پرتشدد مظاہرین سے ہمارا سامنا ہوا یہ تمام مظاہرین آتشی اسلحہ سے لیس تھے جبکہ ہم انہیں بغیر اسلحہ کے کنٹرول کرنے کی کوشش کر رہے تھے۔ اسی دوران پہاڑیوں پر موجود مسلح شرپسندجن کے پاس آتشی اسلحہ تھا وہ ہم پر حملہ آور ہوئے۔ ان تمام لوگوں کے پاس تیس بور رائفل اور پسٹل تھے، ان شرپسندوں نے پہاڑوں پر آگ لگائی اور فائرنگ کرتے ہوئے ہماری جانب بڑھنے لگے۔
ایس ایچ او طاہراقبال نے کہا کہ شرپسندوں نے مجھے تشدد کا نشانہ بناتے ہوئے کھائی میں پھینک دیا جس سے میرا بازو فریکچر ہو گیا اور دیگر چوٹیں بھی آئیں اسی دوران ڈی پی او کے اسکواڈ نے مجھے بچایا۔ میں نے ایک بار پھر اپنے فرائض کی انجام دہی کے لیے آ گیا ہوں اور میں عوام کے جان و مال کے تحفظ کیلئے پرعزم ہوں۔
یاد رہے کہ چند روز قبل اسلام آباد میں تحریک انصاف کے احتجاج کے دوران مظاہرین کی پولیس سے جھڑپیں ہوئیں جس دوران متعدد پولیس اہلکار زخمی ہوگئے تھے جبکہ شرپسندوں کے حملوں کے نتیجے میں تین رینجرز اہلکار اور ایک پولیس اہلکار شہید ہوگیا تھا۔
