تاریخ میں پہلی بار خیبرپختونخوا اسمبلی کا اجلاس کرکٹ سٹیڈیم میں منعقد کرنے کا فیصلہ کیا گیا ہے،سپیکر بابر سلیم سواتی نے 22 اپریل کو اسمبلی اجلاس عمران خان کرکٹ سٹیڈیم میں منقعد کرنے کا اعلان کردیا، دوسری جانب وفاقی وزیر اور صوبائی صدر مسلم لیگ نے امیر مقام نے پی ٹی آئی حکومت کے فیصلے پر سخت ردعمل دیا ہے ۔
پشاور: اسمبلی سیکرٹریٹ نے کرکٹ سٹیڈیم میں اسمبلی اجلاس منعقد کرنے کا اعلامیہ جاری کردیا، اجلاس کی صدارت سپیکر بابر سلیم سواتی کریں گے، اجلاس 22 اپریل کو سہ پہر 3 بجے شروع ہوگا ۔
اسپیکر اسمبلی کے مطابق اجلاس کا مقصد عوام کو اپنے منتخب نمائندوں کی کارکردگی براہ راست دیکھنے کا موقع فراہم کرنا اور جمہوری عمل میں شفافیت کو فروغ دینا ہے ۔
اسپیکر بابر سلیم سواتی کے مطابق یہ اقدام عوامی شمولیت بڑھانے کی ایک کوشش ہے اور آئندہ بھی صوبے کے مختلف اضلاع میں اس طرز کے عوامی اجلاس منعقد کیے جائیں گے، سپیکر نے کہا کہ اس طرح عوام اور نمائندوں کے درمیان براہ راست رابطہ مضبوط ہوگا ۔
ترجمان اسمبلی نے دعویٰ کیا ہے کہ اجلاس کے انعقاد پر حکومتی اور اپوزیشن اراکین کے درمیان اتفاق پایا گیا ہے،جبکہ انتظامات کو حتمی شکل دینے کے لیے محکمہ کھیل، پولیس اور ضلعی انتظامیہ کو ہدایات جاری کر دی گئی ہیں، سیکیورٹی سمیت دیگر انتظامی امور مکمل کرنے کے لیے متعلقہ ادارے متحرک ہیں ۔
دوسری جانب وفاقی وزیر اور صدر پاکستان مسلم لیگ (ن) خیبر پختونخوا انجینئرامیر مقام نے صوبائی اسمبلی کا آئندہ اجلاس ارباب نیاز سٹیڈیم میں منعقد کرنے کے فیصلے پر شدید ردعمل دیتے ہوئے کہا ہے کہ کرکٹ سٹیڈیم اجلاسوں کے لیے نہیں بلکہ کھیل کے لیے بنائے جاتے ہیں ۔
انہوں نے کہا کہ اسمبلی کی باقاعدہ عمارت تمام ضروری سہولیات کے ساتھ موجود ہے، اس کے باوجود سٹیڈیم میں اجلاس بلانے کا فیصلہ سمجھ سے بالاتر اور ایک بھونڈا مذاق ہے ۔
وفاقی وزیر کا کہنا تھا کہ یہ اقدام نہ صرف غیر سنجیدہ ہے بلکہ صوبے کے قیمتی وسائل کا ضیاع بھی ہے، پشاور میں تو ارباب نیاز سٹیڈیم موجود ہے، تاہم “عمران خان سٹیڈیم” کہاں ہے، اس کا علم نہیں ۔
ان کا مزید کہنا تھا کہ خیبرپختونخوا اسمبلی کا اجلاس سٹیڈیم میں بلانے کا فیصلہ محض ایک سیاسی ڈرامہ ہے، صوبائی حکومت گزشتہ تیرہ برس سے عوام کو گمراہ کر رہی ہے ۔
امیر مقام نے کہا کہ اس وقت صوبہ بدترین طرزِ حکمرانی، بدامنی اور معاشی مسائل کا شکار ہے، مگر عوام کو ریلیف دینے کے بجائے حکومت نمائشی اقدامات اور سیاسی شو بازی میں مصروف ہے ۔
