آرمی چیف جنرل عاصم منیر نے کہا ہے کہ پاکستان اور چین کے تعلقات باہمی اعتماد اور تعاون پر مبنی ہیں۔
پاک فوج کے شعبہ تعلقات عامہ (آئی ایس پی آر) کے مطابق چین کے سینٹرل ملٹری کمیشن کے وائس چیئرمین جنرل ژانگ یوشیا نے اعلیٰ سطح کے وفد کے ہمراہ جنرل ہیڈ کوارٹرز (جی ایچ کیو) کا دورہ کیا۔ دورے کے دوران جنرل ژانگ نے سب سے پہلے آرمی چیف جنرل عاصم منیر سے ون آن ون ملاقات کی، جس کے بعد وفود کی سطح پر مذاکرات ہوئے۔
ملاقاتوں میں دونوں ممالک کے باہمی دلچسپی کے امور، علاقائی سلامتی اور دفاعی تعاون کو مزید فروغ دینے پر بات چیت ہوئی۔ جنرل عاصم منیر نے باہمی اعتماد اور تعاون کو بڑھانے پر زور دیا اور پاک چین دوستی کا ذکر کیا۔
آرمی چیف نے اس موقع پر کہا کہ پاکستان اور چین کے تعلقات تاریخی شراکت داری پر مبنی ہیں، اور یہ تعلقات وقت کے ساتھ مزید مستحکم ہو رہے ہیں۔ انہوں نے چینی قیادت کا شکریہ ادا کرتے ہوئے کہا کہ چین نے ہر مشکل وقت میں پاکستان کا ساتھ دیا۔
جنرل عاصم منیر نے مزید کہا کہ دونوں ممالک کے تعلقات نہ صرف اعتماد پر مبنی ہیں بلکہ مشکل حالات میں دونوں نے ایک دوسرے کا ساتھ دیا ہے، اور یہ مثالی تعلقات مزید مضبوط ہو رہے ہیں۔
اس موقع پر جنرل ژانگ نے سٹریٹجک پارٹنرشپ اور دہشت گردی کے خلاف جنگ میں پاکستان کی فوج کی پیشہ ورانہ مہارت کو سراہا۔
آئی ایس پی آر کے مطابق، جی ایچ کیو پہنچنے پر جنرل ژانگ یوشیا نے یادگار شہداء پر پھولوں کی چادر چڑھائی اور چینی سینٹرل ملٹری کمیشن نے پاکستان کے شہداء کو خراج عقیدت پیش کیا۔
