ڈی آئی خان: سکیورٹی فورسز نے ڈیرہ اسماعیل خان میں مختلف کارروائیوں کےدوران جرات و بہادری کی تاریخ رقم کرتے ہوئے 27 دہشتگردوں کو ہلاک کردیا۔ دہشت گردوں کے ساتھ مقابلے میں پاک فوج کے 23 جوان شہید ہوگئے۔
پاک فوج کے شعبہ تعلقات عامہ کے مطابق ڈیرہ اسماعیل خان میں 11اور 12 دسمبر کی درمیانی رات دہشتگردوں ڈی آئی خان کے علاقے درازندہ میں انٹیلی جنس بیسڈ آپریشن کیا گیا۔ آپریشن کے دوران 17 دہشتگرد جہنم واصل کیے گئے۔
آئی ایس پی آر کے مطابق آج صبح 6 دہشتگردوں نے دارابن میں سکیورٹی فورس کی پوسٹ پرحملہ کیا تاہم سکیورٹی فورسز نے چوکی پر دہشتگردوں کے داخلے کی کوشش ناکام بنادی جس پر دہشتگردوں نے بارود سے بھری گاڑی کو چوکی سے ٹکرادیا جس کے نتیجے میں ہونے والے دھماکوں سے عمارت گرگئی اور متعدد اموات ہوئیں۔ آئی ایس پی آر کے مطابق علاقے میں تمام 6 دہشتگردوں کو جہنم واصل کردیا گیا، اس دوران 23 بہادر سپاہیوں نے شہادت کو گلے لگایا۔
آئی ایس پی آر کے مطابق کلاچی میں بھی آپریشن کیا گیا اور دہشتگردوں کے ٹھکانے کو تلاش کیا گیا جب کہ شدید فائرنگ کے تبادلے کے بعد 2 بہادر جوان شہید ہوگئے۔ ہلاک دہشتگرد سکیورٹی فورسز کے خلاف دہشتگردی کی کئی کارروائیوں میں ملوث تھے اور معصوم شہریوں کے قتل میں بھی سرگرم تھے، کارروائیوں کے دوران اسلحہ، گولہ بارود اور دھماکا خیز مواد بھی برآمد کیا گیا۔ آئی ایس پی آر کا کہنا ہےکہ علاقے میں موجود دہشتگردوں کو ختم کرنے کےلیے کلیئرنس آپریشنز جاری ہیں، پاکستان کی سکیورٹی فورسز ملک سے دہشتگردی کے خاتمے کے لیے پرعزم ہیں، ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
