پشاور (حسن علی شاہ) خیبر نیوز اسلام آباد کا ہفتہ وار ٹاک شو "Insight” دنیا بھر میں مقیم پاکستانیوں، خصوصاً پشتون کمیونٹی کی توجہ کا مرکز بن گیا ہے۔
شو میں سینئر صحافی اکرام ھوتی، ڈاکٹر عرفان اشرف، ماہر اقتصادیات ڈاکٹر نیاز اور رکن قومی اسمبلی اخونزادہ چٹان نے میزبان مبارک علی کے ساتھ ایران پر امریکی و اسرائیلی حملے اور ایران کی جوابی کارروائی کے بعد پیدا ہونے والی اقتصادی اور سیاسی صورتحال پر تفصیلی تبادلہ خیال کیا۔
شرکاء نے کہا کہ ایران پر حملہ اسرائیل کے ایما پر کیا گیا، جس کے بعد امریکہ ایک بند گلی میں پھنس چکا ہے۔ ایران کی جانب سے قطر، دوبئی، عمان، سعودی عرب اور اردن میں امریکی بیسز اور تل ابیب پر میزائل حملوں نے تیسری عالمی جنگ کے خدشات کو بڑھا دیا ہے۔ ایران نے آبنائے ہرمز پر اپنا کنٹرول برقرار رکھتے ہوئے دھمکی دی ہے کہ جو بھی بحری جہاز یہاں سے گزرے گا، اسے تباہ کر دیا جائے گا۔
شو میں پاک افغان سرحد پر جاری آپریشنز اور جنوبی پختونخوا میں دہشت گردی کے مسائل پر بھی بحث کی گئی۔ اخونزادہ چٹان نے وزیراعظم کی جانب سے پی ٹی آئی کی دعوت میں عدم شرکت پر افسوس ظاہر کیا اور کہا کہ موجودہ ملکی حالات میں تمام سیاسی اختلافات کو بالائے طاق رکھ کر پاکستان کی سالمیت کو ترجیح دینا ضروری ہے۔
شرکاء نے واضح کیا کہ پاکستان کو غزہ کے پیس بورڈ سے الگ رہنا چاہیے اور ایران کے خلاف کسی جنگ کا حصہ نہیں بننا چاہیے تاکہ قومی مفاد اور استحکام کو یقینی بنایا جا سکے۔
