ایران کے پاسدارانِ انقلاب نے خبردار کیا ہے کہ آبنائے ہرمز سے تیل کا ایک قطرہ بھی گزرنے نہیں دیا جائے گا، جس سے خطے میں کشیدگی مزید بڑھ گئی ہے۔
میڈیا رپورٹس کے مطابق ایران کے پاسدارانِ انقلاب نے اپنے بیان میں کہا کہ سابق امریکی صدر ڈونلڈ ٹرمپ کی جانب سے اب تک آبنائے ہرمز کو کھلا رکھنے کے لیے بحری جہاز بھیجنے کی کوششیں کی جا رہی ہیں، تاہم ایران اس حوالے سے سخت مؤقف رکھتا ہے اور کسی صورت تیل کی ترسیل کی اجازت نہیں دی جائے گی۔
دوسری جانب امریکہ کے وزیر توانائی نے کہا ہے کہ امریکی بحریہ جلد آبنائے ہرمز میں تجارتی جہازوں کو سیکیورٹی فراہم کرے گی تاکہ تیل اور دیگر تجارتی سامان کی ترسیل بلا تعطل جاری رہ سکے۔
ادھر کویتی بندرگاہ کے قریب ایک کارگو ٹینکر کے نزدیک دھماکے کی بھی اطلاعات سامنے آئی ہیں جس کے باعث جہاز سے تیل سمندر میں بہہ گیا۔ رپورٹس کے مطابق اس واقعے میں جہاز کا عملہ محفوظ رہا۔
ماہرین کے مطابق آبنائے ہرمز عالمی تیل کی ترسیل کا ایک انتہائی اہم راستہ ہے اور یہاں بڑھتی ہوئی کشیدگی عالمی توانائی منڈی پر بھی اثر انداز ہو سکتی ہے۔
