سڈنی میں کھیلے گئے دوسرے ٹی ٹوئنٹی میچ میں آسٹریلیا نے پاکستان کو 13 رنز سے شکست دے کر سیریز میں دو صفر کی فیصلہ کن برتری حاصل کرلی ۔
آسٹریلیا کی جانب سے 148 رنز ہدف کے تعاقب میں پاکستان ٹیم 19.4 اوورز میں 134 رنز بنا کر آؤٹ ہوگئی۔
اس سے قبل آسٹریلیا کے کپتان جوش انگلس نے ٹاس جیت کر پہلے بیٹنگ کا فیصلہ کیا،میزبان ٹیم کے اوپنرز نے جارھانہ کھیل کا آغاز کیا کیا تاہم پاکستان باولرز نے زبردست کم بیک کیا اور یوں مخالف ٹیم کی وکٹیں وقفے وقفے سے گرتی رہیں ۔
پاکستان کو اننگز کے پہلے دو اوورز مہنگے پڑے لیکن حارث رؤف نے 52 کے مجموعے پر پہلے جیک فریسر اور پھر کینگروز کپتان جوس انگلس کو پویلین بھیج دیا، عباس آفریدی نے میتھیو شارٹ کو 32 کے انفرادی سکور پر آؤٹ کیا۔ ایرون ہارڈی 28 رنز بنا کر عباس آفریدی کا شکار بنے۔
مقررہ 20 اووز میں آسٹریلیا کی ٹیم نے 9 وکٹوں کے نقصان پر 147 رنز بنائے۔ حارث رؤف نے 4 ،عباس آفریدی نے 3 اور سفیان مقیم نے 2کھلاڑیوں کو آؤٹ کیا ۔
آسٹریلیا کے 148 رنز ہدف کے تعاقب میں پاکستان ٹیم 19.4اوورز میں 134 رنز بنا کر آؤٹ ہوگئی۔ عثمان خان نے 52 رنز کی اننگز کھیلی جب کہ عرفان خان 37 رنز بنا کر ناقابل شکست رہے۔کپتان محمد رضوان نے 16 رنز بنائے۔صاحبزادہ فرحان نے5 اور عباس آفریدی نے 4 رنزبنائے۔ بابراعظم نے 3 اور حارث رؤف نے 2 رنز بنائے۔
آسٹریلیا کی جانب سے سپنسر جانسن نے شاندار باولنگ کی اور پانچ وکٹیں حاصل کرنے پر میچ کے بہترین کھلاڑی قرار پائے ۔پاکستان اور آسٹریلیا کے درمیان سیریز کا تیسرا اور آخری میچ پیر کو ہوبارٹ میں کھیلا جائے گا ۔
