بھارت کی ریاست بہار کے ضلع ویسٹ چمپارن کے ایک دیہی علاقے "موہچھی بنکٹوا” میں ایک ایسا واقعہ پیش آیا جس نے سب کو حیران کر دیا۔ یہاں ایک سالہ بچہ "گووندا” اس وقت موضوعِ گفتگو بن گیا جب اس نے زہریلے کوبرا سانپ کو اپنے دانتوں سے کاٹ کر ہلاک کر دیا۔
یہ واقعہ کچھ دن قبل مظہولیا بلاک میں پیش آیا۔ گووندا اپنے گھر کے قریب کھیل رہا تھا جب اچانک اس کی نظر ایک کوبرا سانپ پر پڑی۔ اسے شاید یہ خیال ہوا کہ یہ کوئی کھلونا ہے۔ اُس نے پہلے اسے کسی چیز سے مارا اور پھر اپنے ننھے دانتوں سے کاٹ لیا۔ حیران کن طور پر، سانپ موقع پر ہی ہلاک ہو گیا۔
کچھ ہی گھنٹوں بعد گووندا بے ہوش ہو گیا جس پر گھر والوں نے گھبرا کر فوراً اُسے قریبی پرائمری ہیلتھ سینٹر پہنچایا۔ وہاں سے فوری طور پر اسے گورنمنٹ میڈیکل کالج اینڈ ہسپتال، بیٹیاہ منتقل کیا گیا۔
ڈاکٹروں کے مطابق گووندا کی حالت اب خطرے سے باہر ہے، وہ مکمل طور پر زیرِ نگرانی ہے۔ ان کا کہنا ہے کہ بچے کے جسم میں زہر کا کوئی اثر نہیں ملا۔ کوبرا سانپ کی موت غالباً اُس کے سر اور منہ پر لگنے والی چوٹوں کی وجہ سے ہوئی جو بچے کے حملے کے دوران آئیں۔
گووندا کی دادی نے بتایا کہ جب یہ واقعہ ہوا تو بچے کی ماں قریب ہی لکڑیاں جمع کر رہی تھی۔ انہوں نے کہا، "جب ہم نے دیکھا کہ گووندا کے ہاتھ میں سانپ ہے تو فوراً دوڑ پڑے، لیکن تب تک وہ اسے مار چکا تھا۔”
یہ واقعہ نہ صرف گاؤں بھر میں بلکہ اردگرد کے علاقوں میں بھی موضوعِ بحث بن چکا ہے۔ مقامی افراد، خصوصاً ڈاکٹرز نے اسے ایک "انتہائی غیر معمولی اور ناقابلِ یقین” واقعہ قرار دیا ہے۔
