کلرکہار سروس ایریا میں پیش آنے والے ایک واقعے نے موٹروے پولیس کی ایمانداری اور پیشہ ورانہ مہارت کی روشن مثال قائم کر دی۔ ایک مسافر اپنی گاڑی میں سفر کے دوران 53 لاکھ روپے نقدی سے بھرا بیگ سروس ایریا میں بھول کر اپنی منزل کی جانب روانہ ہو گیا۔
کئی کلومیٹر سفر طے کرنے کے بعد جب مسافر کو اپنی قیمتی رقم کا احساس ہوا تو وہ شدید پریشانی میں مبتلا ہو گیا۔ اس نے فوری طور پر موٹروے پولیس کی گشت کرتی گاڑی کو روک کر واقعے کی اطلاع دی۔
موٹروے پولیس نے بروقت اور مؤثر کارروائی کرتے ہوئے قریبی ٹیم کو آگاہ کیا۔ موبائل اور ویڈیو کال کے ذریعے مسافر سے بیگ کی تفصیلات حاصل کی گئیں اور سروس ایریا میں فوری تلاش کا عمل شروع کر دیا گیا۔ مختصر وقت میں بیگ نقدی سمیت بحفاظت برآمد کر لیا گیا۔
اہلکاروں نے ایمانداری اور ذمہ داری کا مظاہرہ کرتے ہوئے رقم خود مسافر تک پہنچائی، جس پر مسافر نے موٹروے پولیس کا تہہ دل سے شکریہ ادا کیا اور ان کی پیشہ ورانہ خدمات کو سراہا۔
اس موقع پر آئی جی موٹروے پولیس سلطان احمد چوہدری اور ایڈیشنل آئی جی محمد وصال فخر سلطان نے متعلقہ افسران کی کارکردگی کی تعریف کی اور ان کے لیے خصوصی انعام کا اعلان کیا۔
