اسلام آباد: بنگلہ دیش سول سروس کے اعلیٰ سطحی وفد نے نیشنل ڈیزاسٹر مینجمنٹ اتھارٹی (این ڈی ایم اے) ہیڈکوارٹرز اسلام آباد کا دورہ کیا۔
وفد نے (این ڈی ایم اے) ہیڈکوارٹرز میں قائم نیشنل ایمرجنسیز آپریشن سینٹر (این ای او سی) کا دورہ کیا۔
وفد کو جدید ڈیزاسٹر مینجمنٹ سسٹم، ارلی وارننگ سسٹمز اور پیشگی حفاظتی اقدامات پر تفصیلی بریفنگ دی گئی۔
چیئرمین این ڈی ایم اے لیفٹیننٹ جنرل انعام حیدر ملک نے اس موقع پر علاقائی تعاون، مشترکہ حکمت عملی اور تجربات کے تبادلے کی اہمیت پر زور دیا۔
لیفٹیننٹ جنرل انعام حیدر ملک نے کہا کہ قدرتی آفات سے مؤثر انداز میں نمٹنے کے لیے مربوط اقدامات ناگزیر ہیں۔
وفد کو این ای او سی کی آپریشنل صلاحیتوں، پیشگی انتباہی نظام، قومی وسائل کے مؤثر استعمال اور ہنگامی صورتحال میں ردعمل کے طریقہ کار سے بھی آگاہ کیا گیا۔
بریفنگ کے دوران پاکستان اور دیگر ممالک کو 2026 کے دوران درپیش ممکنہ خطرات اور چیلنجز پر بھی تفصیلی تبادلہ خیال کیا گیا۔
دونوں ممالک نے آفات سے نمٹنے، سرچ اینڈ ریسکیو آپریشنز، صلاحیت سازی اور علاقائی خطرات کی تشخیص و تدارک کے شعبوں میں تعاون مزید مضبوط بنانے پر اتفاق کیا۔
