ضمنی انتخابات کے لئے پنجاب پولیس نے تمام سکیورٹی انتظامات مکمل کر لئے ہیں
لاہور سمیت پنجاب کے 14 قومی و صوبائی حلقوں میں پولیس نے ضمنی انتخابات کیلئےسکیورٹی انتظامات مکمل کر لئے ہیں۔پولیس ترجمان کے مطابق پنجاب کے 14 قومی و صوبائی حلقوں پر منعقدہ ضمنی انتخابات کی سکیورٹی پر 35 ہزار سے زائد افسران و اہلکار تعینات کیے جائے گے، صوبہ بھر کے 2 ہزار 599 پولنگ سٹیشنز میں سے 419 انتہائی حساس اور جبکہ ایک ہزار 89 حساس قرار دیئے گئے ہیں۔
آئی جی پنجاب ڈاکٹر عثمان انور کے مطابق 40 لاکھ 44 ہزار سے زائد ووٹرز کو حق رائے دہی کے لئے پرامن اور محفوظ ماحول فراہم کریں گے، 663 مردانہ، 649 زنانہ، ایک ہزار 289 جوائنٹ پولنگ سٹیشنز اور الیکشن کمیشن کے عملے کو بھرپور سکیورٹی دیں گے۔ان کے مطابق سی سی ٹی وی کیمروں کی انتہائی حساس پولنگ سٹیشنز پرتنصیب مکمل کر لی گئی ہے۔
آئی جی نے کہا کہ سنٹرل پولیس آفس، سیف سٹیز اتھارٹی، اضلاع کے کنٹرول اینڈ مانیٹرنگ رومز سے پولنگ کے عمل کی مسلسل نگرانی کی جائے گی، فورس مکمل طور پر اعتماد ہے، انشاء اللہ محفوظ اور پرامن ضمنی انتخابات کا انعقاد یقینی بنائیں گے۔مزید ڈاکٹر عثمان انور کا کہنا تھا کہ ضمنی انتخابات کیلئے پنجاب پولیس کو رینجرز اور پاک آرمی کی مکمل معاونت حاصل ہے، الیکشن کمیشن کے ضابطہ اخلاق، دفعہ 144 اور اسلحہ کی پابندی کی خلاف ورزی پر زیرو ٹالرنس کی جائے گئی۔
