چین میں موسلادھار بارشوں کے بعد سیلابی صورتحال پیدا ہوگئی ہے
چین کے جنوبی علاقوں میں تیزہواؤں کے ساتھ موسلادھار بارشوں سے نظام زندگی درہم برہم ہو کر رہ گئی ہےجبکہ چھ افراد کے زخمی ہونے کی اطلاعات بھی موصول ہوئی ہیں۔بین الاقوامی میڈیا رپورٹ کے مطابق موسلا دھار بارشوں کے باعث ٹریفک اور ٹرینوں کا نظام درہم برہم ہوگیا ہے جبکہ کئی افراد مختلف حادثات میں زخمی ہوگئے ہیں،متعدد گھروں کی چھتیں بھی تیز ہواؤں سےاڑ گئیں۔ مسلسل بارشوں کے باعث صوبے گوانگ ڈونگ کے کئی علاقوں میں ہنگامی صورت حال پیدا ہوگئی اور چین کے گوانگ ڈونگ میں سڑکوں، رہائشی علاقوں اور کھیتوں میں کئی فٹ پانی کھڑا ہوگیا ہے۔
جیانگ ژی صوبے میں بھی مسلسل بارشوں کے باعث شدید خراب موسم کا اورنج الرٹ جاری کردیا گیا ہے، گوانگ ژی میں مسلسل بارشوں کے بعد مٹی کے تودے گرنے کے 65 واقعات رپورٹ ہوچکے ہیں۔اس حوالے سے چینی میڈیا کا کہنا ہے کہ پانی میں پھنسے 80 ہزار سے زائد افراد کو نکال لیا گیا ہے جبکہ شدید بارشوں کے بعد 10 لاکھ سے زائد افراد بجلی سے محروم ہوگئے ہیں اور سینکڑوں اسکولوں کو بند کردیا گیا ہے۔حکام نےسیلاب سے لاکھوں افراد کے بے گھر ہونے کے خدشے پرایمرجنسی ایڈوائزری بھی جاری کردی ہے،پانی کی سطح ڈیموں اور دریاؤں میں بڑھنے سے بھی سیلاب کا خطرہ پیدا ہوگیا ہے۔
