وادی تیراہ میں دہشت گردوں نے چھٹی پر آئے ہوئے پاک آرمی کے جوان کو اغواء کرنے کے لیے اس کے گھر پر دھاوا بولا لیکن علاقہ مکینوں نے بہادری کا مظاہرہ کرتے ہوئے سخت مزاحمت کی اور جوان کو ان کی تحویل میں دینے سے انکار کرتے ہوئے دہشت گردوں کو بھاگنے پر مجبور کردیا۔
واقعات کے مطابق وادی تیراہ کے علاقہ برقمبرخیل ولی خیل میں کل شام کو دہشت گردوں نے پاک آرمی کے جوان جو کہ ڈیوٹی سے چھٹی پر وادی تیراہ اپنے گھر آئے تھے، کے گھر دھاوا بولا اور انہیں زبردستی اٹھا کر ساتھ لے جانے کی کوشش کی۔
دہشتگردوں نے زبردستی گھر کے اندر گھس کر خواتین پر فائرنگ بھی کی، فائرنگ سے کوئی جانی نقصان نہیں ہوا۔ حالات کو دیکھتے ہوئے شہریوں نے مساجد میں اعلانات شروع کر دیئے اور مقامی قبائل نے سخت مزاحمت اختیار کرتے ہوئے بہادری کا مظاہرہ کیا اور پاک آرمی کے جوان نورسلیم ولد خلوت کی حوالگی سے انکار کرتے ہوئے دہشت گردوں کو بھاگنے پر مجبور کردیا۔
زرائع کے مطابق مسلح دہشت گرد پاک آرمی کے جوان کو زبردستی اٹھا کر نامعلوم مقام منتقل کرنا چاہتے تھے تاہم مساجد میں اعلانات کے باعث سینکڑوں لوگ گھروں سے نکل گئے اور جوان کو دہشت گردوں کی تحویل میں دینے سے سختی سے انکار کرتے ہوئے محفوظ مقام منتقل کردیا۔ پاک آرمی جوان نور سلیم کی ڈیوٹی 7بلوچ یونٹ میں ہے اور اس وقت بلوچستان کے ضلع آوران میں فرائضی منصبی سرانجام دے رہا ہے۔
