لاہور: وفاقی وزیر داخلہ محسن نقوی سے غیر ملکی سرمایہ کار کمپنیوں کے وفد نے ملاقات کی، ملاات کے دوران سرمایہ کاروں کے تحفظ اور سرمایہ کاری کو محفوظ بنانے کیلئے کئے گئے اقدامات پر تبادلہ خیال کیا گیا ۔
محسن نقوی نے وفد سے گفتگو کرتے ہوئے کہا کہ پاکستان ہر طرح کی سرمایہ کاری کے لئے محفوظ ملک ہے، پاکستان میں سرمایہ کاری کرنے والے انویسٹرز کا تحفظ ہماری حکومت کی اولین ترجیح ہے، حکومت نے سرمایہ کاری کے تحفظ کیلئے تمام تر اقدامات کئے ہیں ۔
وزیر داخلہ نے مزید کہا ہے کہ بعض شرپسندوں کے حملوں کا سخت نوٹس لیا ہے اور ملزمان کے خلاف قانون کے مطابق کارروائی کی جا رہی ہے، مستقبل میں ایسے واقعات کی روک تھام کیلئے حکمت عملی وضع کر لی ہے، ہمارا دین اسلام امن و آشتی کا درس دیتا ہے، سرمایہ کاروں کے تحفظ کی ذمہ داری ہر صورت نبھائیں گے ۔
وزیر داخلہ محسن نقوی نے وفد کی تجاویز کو نوٹ کیا اور ہرممکن تعاون فراہم کرنے کی یقین دہانی کرائی،وفد نے مسائل کے حل کے لئے یقین دہانی پر وفاقی وزیر داخلہ محسن نقوی کا شکریہ ادا کیا ۔
