وفاقی کابینہ نے آئندہ مالی سال 27۔ 2026 کے فنانس بل اورسرکاری ملازمین کی تنخواہوں اور پنشن میں 7 فیصد اضافے کی منظوری دے دی، گریڈ ایک سے 16 تم کے ملازمین کی تنخواہوں میں زیادہ اضافہ کرنے کا فیصلہ بھی کیا گیا ہے، وزیراعظم شہبازشریف نے فنانس بل پر دستخط بھی کردیئے ۔
اسلام آباد: وزیراعظم شہبازشریف کی زیرصدارت وفاقی کابینہ کا اجلاس پارلیمنٹ ہاؤس میں ہوا، اجلاس کے دوران آئندہ مالی سال کے بجٹ دستاویزات اور فنانس بل مسودے کی منظوری دے دی گئی ۔
وفاقی کابینہ نے سرکاری ملازمین کی تنخواہوں میں 7 فیصد اضافے کی منظوری بھی دی، جبکہ تنخواہوں میں اضافہ دو مرحلے میں کیا جائے گا ۔
وفاقی کابینہ کے اجلاس سے خطاب میں وزیر اعظم نے کہا کہ آج ہم اپنی حکومت کا تیسرا بجٹ پیش کرنے جارہے ہیں، توقع ہے تیسرابجٹ ہماری معیشت کو مزید تیزی سے آگے لے کر جائے گا ۔
انہوں نے کہا کہ تمام تر معاشی چیلنجز کے باوجود بہتر بجٹ پیش کرنے کی کوشش کی، عوام کا شکریہ ادا کرتا ہوں جنہوں نے بڑے صبر و تحمل سے مہنگائی کو برداشت کیا ۔
وزیر اعظم شہبازشریف نے کہا کہ مہنگائی 38 فیصد سےکم ہوکرسنگل ڈیجٹ میں آئی لیکن خلیج کی صورتحال سے اس میں تھوڑا اضافہ ہوگیا، تمام چیلنجز کے باجود آج ہماری معیشت بہتر ہورہی ہے ۔
وزیر اعظم شہباز شریف کا مزید کہنا تھا کہ اس بجٹ کو بنانے میں بہت چیلنجز تھے، ہمیں عام آدمی کی مشکلات کا بخوبی اندازہ ہے ۔
