وفاقی وزیر خزانہ کی امریکا میں سعودی فنڈ برائے ترقی کے سربراہ سے ملاقات

وفاقی وزیر خزانہ سینیٹر محمد اورنگزیب نے ورلڈ بینک اور آئی ایم ایف کے بہار اجلاس 2026ء کے موقع پر سعودی فنڈ برائے ترقی (ایس ایف ڈی) کے چیف ایگزیکٹو آفیسر سلطان بن عبدالرحمان المرشد سے ملاقات کی۔ وزیر خزانہ نے سعودی فنڈ برائے ترقی کی جانب سے پاکستان کے لیے جاری تعاون اور آئندہ ترقیاتی شراکت داری پر ان کا شکریہ ادا کیا۔
سینیٹر اورنگزیب نے واشنگٹن روانگی سے قبل سعودی عرب کے وزیر خزانہ سے اپنی حالیہ ملاقات کا بھی ذکر کیا اور کہا کہ یہ ملاقات نہایت مفید رہی اور دونوں ممالک کے مضبوط تعلقات کی عکاسی کرتی ہے۔ ملاقات میں مشرق وسطیٰ میں جاری تنازع کے عالمی توانائی سلامتی پر اثرات اور اس کے ممکنہ معاشی نتائج پر بھی تبادلہ خیال کیا گیا۔ وزیر خزانہ نے اس تنازع کے جلد حل کی امید ظاہر کی اور پاکستان اور سعودی عرب کے درمیان تعاون کو مزید فروغ دینے کی اہمیت پر زور دیا۔
ملاقات میں پاکستان اور سعودیہ کے درمیان مضبوط اور دیرینہ شراکت داری کے عزم کا اعادہ کیا گیا اور اقتصادی و ترقیاتی تعاون کو مزید مستحکم بنانے پر اتفاق کیا گیا۔