ڈیرہ اسماعیل خان میں فرنٹیئر کانسٹیبلری (ایف سی) کی گاڑی پر دہشتگردوں کی جانب سے فائرنگ کی گئی ہے، جس کے نتیجے میں دو سپاہی شہید اور چار شدیدی زخمی ہوگئے۔
وزارت داخلہ کے ترجمان کی جانب سے جاری بیان کے مطابق شہید سپاہی شیر الرحمان اور سید امین نے دہشتگردوں کا دلیری سے مقابلہ کیا۔
ترجمان کے مطابق شہید سپاہی شیر الرحمان کا تعلق جنوبی وزیرستان سے جبکہ شہید سپاہی سید امین کا تعلق صوابی کے علاقے گدون سے تھا۔
ترجمان کے بیان کے مطابق زخمیوں میں حوالدار امتیاز، سپاہی محب شاہ، سپاہی صاحب دین اور سپاہی فضل کریم شامل ہیں۔
ترجمان وزارت داخلہ کے مطابق ایف سی کے زخمی چاروں سپاہیوں کو ہسپتال میں منتقل کر دیا گیا ہے۔
ترجمان کے بیان میں کہا گیا کہ فرنٹیئر کانسٹیبلری دہشتگردوں کے ناپاک عزائم خاک ملانے کے لیے پرعزم ہے، ایف سی کے سپاہیوں کی قربانیاں دہشتگردی کے خلاف جنگ میں پختہ عزم کی عکاس ہیں۔
