بھارتی ریپر بادشاہ کے ساتھ تعلقات پر ہانیہ عامر کا ردعمل سامنے آگیا ہے۔
پاکستانی مشہور اداکارہ ہانیہ عامر نے بھارت کے مقبول ریپر ادیتیہ پرتیک سنگھ المعروف بادشاہ کے ساتھ تعلقات کی خبروں پر ردعمل دے دیا ہے۔کچھ روز قبل مشہور اداکارہ ہانیہ عامر نے برطانوی نشریاتی ادارے بی بی سی کے صحافی کو انٹرویو دیا جس میں ہانیہ عامر سے سوال کیا گیا کہ ان کی اور بادشاہ کی دوستی کیسے ہوئی؟
اس کے جواب میں ہانیہ نے مسکراتے ہوئے پہلے تو کہا کہ یہ تو ذاتی نوعیت کا سوال ہے ہانیہ کے اس جواب پر میزبان نے اصرار کرتے ہوئے کہا کہ آپ دونوں پبلک فگرز ہیں،اس پر اداکارہ نے جواب دیا کہ یہ سب کچھ انسٹاگرام کے ذریعے ہوا ہے۔ہانیہ عامر نے بتایا کہ بادشاہ نے دراصل میری ایک ریل پر کمنٹ کیا جس کے بعد میرے دوستوں نے مجھے کہا کہ ارے بادشاہ نے تمہاری پوسٹ پر کمنٹ کیا ہے۔
مزید انہوں نے بتایا کہ پھر بھارت کے مقبول ریپر ادیتیہ پرتیک سنگھ المعروف بادشاہ نے مجھے میسج کیا جس کے بعد ہماری تھوڑی بات چیت ہوئی۔ان کے اس جواب پر میزبان نے کہا کچھ لوگ یہ سمجھتے ہیں کہ آپ لوگوں کے درمیان کوئی رومانوی تعلق ہے جس پر اداکارہ ہانیہ نے جواب دیا کہ نہیں ایسا کچھ نہیں ہے، کبھی کبھار مجھے ایسا لگتا ہے کہ میرا مسئلہ صرف یہ ہے کہ میں شادی شدہ نہیں ہوں۔ہانیہ عامر نے وضاحت دیتے ہوئے کہا کہ اگر میں شادی شدہ ہوتی تو شاید لوگ میرے متعلق ایسی فضول باتیں نہ کرتے اور میں ان بیکار قسم کی افواہوں سے دور رہتی۔
