بنوں میں امن جرگہ سے خطاب کے دوران وزیراعلیٰ علی امین گنڈاپور نے واضح کیا ہے کہ خیبرپختونخوا میں آپریشن نہیں ہونے دیں گے، ہمارے فیصلے کوئی اور نہیں کرے گا بلکہ ہم خود کریں گے۔
علی امین گنڈاپور نے کہا کہ امن اور انصاف مانگیں گے نہیں، امن اور انصاف چھینیں گے ، اور یہ ہمارا حق ہے،ہم نے پاکستان کے لیے اپنا خون بھی بہایا ، تن من دھن کی قربانی بھی دی ۔
انھوں نے کہا کہ تاریخ گواہ ہے ہمیں بہت قربانیاں دینی پڑیں۔سب سن لیں! امن مانگیں گے نہیں امن لیں گے، حلف دیتا ہوں حق، امن اور انصاف کے لیے عوام کے ساتھ کھڑا رہوں گا، خیبرپختونخوا کی سرزمین پرکوئی ہم پر ظلم وجبر نہیں کرسکتا۔
وزیراعلیٰ کا کہنا تھاکہ غلط پالیسیوں کی وجہ سے خیبرپختونخوا کے لوگوں نے نقصان اٹھایا، قربانی دینا ہمارے خون میں ہے پھر بھی اس ملک کے لیے قربانی دیں گے، ایسے عناصر موجود ہیں جو ہماری بات کو توڑ مروڑ کر پیش کرتے ہیں۔
علی امین گنڈاپور کا کہنا تھا کہ پہلے بھی کہا تھا کہ اپنی اصلاح کرلو جو اصلاح نہیں کرے گا سزا کے لیے تیار رہے جہاں شرپسندوں کا شبہ ہوگا وہاں پولیس کارروائی کرے گی، کوئی مسلح گروہ یا مسلح شخص مجھے خیبرپختونخوا میں نظر نہ آئے، کوئی کسی پر ناجائز ہاتھ ڈالنے سے پہلے سوچ لے کہ یہ ہاتھ مجھ پر ڈالا جائے گا۔
انہوں نے کہا کہ پولیس کو اختیار دیتا ہوں منشیات فروشوں کو مت چھوڑیں میں آپ کے ساتھ ہوں، ہمارا شخصیت سے تو اختلاف ہوسکتا ہے لیکن شہدا سے متعلق غلط بات پر مجھے تکلیف ہوتی ہے۔
ان کا مزید کہنا تھاکہ خیبرپختونخوا کے عوام سن لیں کہ مدرسے کے بچے ہمارے دلوں کے بہت قریب ہیں، بجٹ میں مدرسے کے طلبا کے لیے بھی فنڈز رکھے ہیں، مدرسے کے طلبہ کو بنیادی تعلیم اور روزگار میں بھی حق دیں گے۔
