مسلم لیگ (ن) اور پیپلز پارٹی کے درمیان مختلف بجٹ تجاویز پر اتفاق ہوگیا، وزیراعظم نے پیپلز پارٹی کی پیش کردہ بجٹ تجاویز منظور کرلیں، کشمیر کے معاملے پر پیپلز پارٹی نے حکومت کو مذاکرات کا راستہ اپنانے کی تجویز دیدی ۔
اسلام آباد: ایوان صدر میں وزیراعظم شہباز شریف کی وفاقی وزرا کے ہمراہ صدر مملکت آصف علی زرداری سے ملاقات ہوئی اور اس دوران مختلف معاملات پر دونوں پارٹیوں کے درمیان اہم اجلاس بھی ہوا ۔
اجلاس میں ن لیگ اور پیپلز پارٹی کی سینئر قیادت موجود رہی، نائب وزیراعظم اسحاق ڈار، وفاقی وزرا محسن نقوی، محمد اورنگزیب، اعظم نذیر تارڑ، معاون خصوصی رانا ثنا اللہ، بلاول بھٹو اور ان کی بجٹ کمیٹی کے ارکان، وزیراعظم آزاد کشمیر فیصل راٹھور سمیت دیگر موجود تھے ۔
اجلاس میں وفاقی بجٹ سمیت، آزاد کشمیر کی صورتحال پر بات ہوئی، صدر زرداری اور بلاول بھٹو نے تجویز دی تھی کہ آزاد کشمیر میں مذاکرات کا آغاز کیا جائے اور معاملات کو سیاسی طریقے سے حل کیا جائے، آج اجلاس میں اس تجویز کو وزیراعظم کے سامنے رکھا گیا ۔
اجلاس میں اتفاق کیا گیا کہ معاملات کو مذاکرات کے ذریعے حل کیا جائے گا، ذرائع کے مطابق اجلاس میں بجٹ سازی پر بھی بات ہوئی۔ کچھ دن قبل پیپلز پارٹی نے مختلف تجاویز حکومت کو پیش کی تھیں اور مطالبہ کیا تھا کہ ان تجاویز کو بجٹ کا حصہ بنایا جائے ۔
مسلم لیگ (ن) اور پیپلز پارٹی کے درمیان مختلف بجٹ تجاویز پر اتفاق ہوگیا، وزیراعظم نے پیپلز پارٹی کی پیش کردہ بجٹ تجاویز منظور کرلیں، کشمیر کے معاملے پر پیپلز پارٹی نے حکومت کو مذاکرات کا راستہ اپنانے کی تجویز دیدی ۔
