راولپنڈی کی انسداد دہشتگری عدالت کے جج امجد علی شاہ نے 9 مئی جی ایچ کیو حملہ کیس میں پاکستان تحریک انصاف کے بانی و سابق وزیراعظم عمران خان کی بریت کی درخواست خارج کردی ۔
انسداد دہشتگری کی عدالت نے جی ایچ کیو حملہ کیس میں عمران خان سمیت دیگر 2 ملزمان کی درخواست بریت مسترد کی، فیصلہ انسداد دہشت گردی عدالت کے جج نے سنایا ۔
دوران سماعت پراسیکیوٹر نے اپنے دلائل میں بتایا کہ ملزمان کے خلاف استغاثہ کے پاس کافی شواہد ہیں، ملزمان پر فرد جرم عائد ہو چکی ہے، استغاثہ کے گواہان شہادت ریکارڈ کروا رہے ہیں ۔
انہوں نے کہا کہ 12 گواہان کے بیانات ریکارڈ ہو چکے ہیں، ٹرائل کے دوران بریت کی درخواست نہیں بنتی ،عدالت نے دلائل سننے کے بعد ملزم کی بریت کی درخواستیں مسترد کر دی ۔
اس سے قبل انسداد دہشتگردی عدالت راولپنڈی نے دو پی ٹی آئی رہنماؤں اجمل صابر اورسہیل عرفان عباسی کی درخواست بریت خارج کی تھی ۔
25 جنوری 2025 کو ہونے والی گزشتہ سماعت پر راولپنڈی کی اڈیالہ جیل میں عمران خان سمیت دیگر ملزمان کے خلاف 9 مئی کو جنرل ہیڈ کوارٹر حملہ کیس میں مزید 3 گواہان کا بیان ریکارڈ کیا گیا تھا ۔
