وزیراعظم شہباز شریف نے کہا ہے کہ سی پیک اب اپنے دوسرے مرحلے میں داخل ہو رہا ہے اور دوسرے مرحلے میں پاکستان اور چین کے درمیان بزنس ٹو بزنس طرز پرمعاملات طے کیے جائیں گے، چین ہمارا دوست ملک ہے، چین کے ساتھ بھائی چارے پر مبنی ہمارے تاریخی تعلقات ہیں ۔
اسلام آباد: وزیراعظم شہبازشریف کی زیرصدارت ملک میں چین کے باشندوں کی سکیورٹی سے متعلق جائزہ اجلاس ہوا، وفاقی وزیر داخلہ محسن نقوی نے ملک میں چینی باشندوں کیلئے خصوصی سکیورٹی انتظامات پر بریفنگ دی ۔
وزیر داخلہ نے بریفنگ دیتے ہوئے کہا کہ دہشتگردی کے خدشات کے پیش نظر چینی باشندوں کی خصوصی سکیورٹی کے انتظامات نافذ العمل ہیں، وفاق اور تمام صوبے اس ضمن میں بھرپور تعاون کے ساتھ کام کر رہے ہیں ۔
اس موقع پر وزیراعظم کا کہنا تھاکہ چین ہمارا دوست ملک ہے، چین کے ساتھ بھائی چارے پر مبنی ہمارے تاریخی تعلقات ہیں ۔
انہوں نے کہا کہ چینی بھائیوں کا تحفظ حکومت پاکستان کی اولین ترجیح ہے، ملک بھر میں چینی باشندوں کی مؤثرسکیورٹی کیلئے متعدد اقدامات لیے جارہے ہیں، سیف سٹی منصوبے بڑھتی ہوئی استعداد کی بہترین مثال ہیں، پورے ملک میں عالمی معیارکے مطابق سیف سٹی منصوبے تعمیر کیے جا رہے ہیں ۔
ان کا کہنا تھاکہ سی پیک پاکستان اور چین کا انتہائی اہم مشترکہ منصوبہ ہے، سی پیک اب اپنے دوسرے مرحلے میں داخل ہو رہا ہے اور دوسرے مرحلے میں دونوں ممالک کے درمیان بزنس ٹو بزنس طرز پرمعاملات طے کیے جائیں گے ۔
وزیراعظم نے کہا کہ سی پیک کی ترقی کے تناظر میں پاکستان میں چینی باشندوں کا تحفظ مزید اہمیت کا حامل ہے، ہم ملک میں چینی برادری کیلئے ایک محفوظ اور کاروبار دوست ماحول تعمیر کررہے ہیں، پاکستانی معیشت میں چینی کمپنیوں کا اعتماد ہمارے معاشی مستقبل کیلئے انتہائی اہم ہے ۔
