رات کی تاریکی میں پاکستان پر جارحیت اور بلا اشتعال فائرنگ بھارت کے گلے پڑ گئی، پاک فوج کی جوابی کارروائی کے خوف سے آئی پی ایل کو غیر معینہ مدت تک کیلئے معطل کردیا گیا ۔
بھارتی کرکٹ بورڈ نے پاک بھارت کشیدگی اور سیکیورٹی خدشات میں اضافے کے باعث انڈین پریمیئر لیگ کو غیرمعینہ مدت کیلئے معطل کر دیا ۔
یہ فیصلہ ایسے وقت میں سامنے آیا ہے جب گزشتہ روز پنجاب کنگز اور دہلی کیپٹلز کے درمیان دھرم شالا میں کھیلا جانے والا میچ سیکیورٹی مسائل کی وجہ سے منسوخ کر دیا گیا تھا، یہ مقام پٹھان کوٹ سے 10 کلومیٹر سے بھی کم فاصلے پر واقع ہے، جہاں فضائی حملے کا ہنگامی انتباہ جاری کیا گیا تھا، جس کی وجہ سے بی سی سی آئی نے یہ فیصلہ کیا ۔
بی سی سی آئی کے ذرائع نے اخبار کو بتایا کہ ’ہم نے آئی پی ایل کو غیر معینہ مدت کے لیے معطل کرنے کا فیصلہ کیا ہے، کھلاڑیوں کی سلامتی ہماری ترجیحات میں سرفہرست ہے، اس لیے ہم نے اس وقت ٹورنامنٹ کو روکنے کا فیصلہ کیا، یہ فیصلہ بعد میں کریں گے کہ ٹورنامنٹ دوبارہ کب شروع کرنا ہے، اس وقت قومی مفاد سب سے اہم ہے‘ ۔
گزشتہ روز دھرم شالہ میں بارش کی وجہ سے مقررہ وقت کے بعد شروع ہونے والا میچ اچانک روک دیا گیا تھا اور اسٹیڈیم کی فلڈلائٹس بجھا دی گئی تھیں ۔
ابتدا میں فلڈ لائٹس کی بندش کو تکنیکی خرابی سمجھا گیا، لیکن جب کھلاڑیوں اور انتظامیہ کو فضائی حملے کے خطرات کے بارے میں آگاہ کیا گیا تو صورتحال تیزی سے بگڑ گئی ۔
ایک کھلاڑی نے انڈین ایکسپریس کو بتایا کہ دونوں ٹیموں میں خوف تھا اور غیر ملکی کھلاڑی خاص طور پر اپنی حفاظت کے بارے میں فکر مند تھے ۔
آسٹریلوی میڈیا نے پہلے رپورٹ میں کیا تھا کہ ان کے کھلاڑیوں نے بھی اپنی حفاظت کے بارے میں تشویش کا اظہار کیا اور وہ گھر واپس جانا چاہتے تھے ۔
