خیبرپختونخوا:قومی ذیلی پولیو مہم ملتوی کرنے کا فیصلہ

خیبرپختونخوا میں قومی ذیلی پولیو مہم ملتوی کرنے کا فیصلہ کیا گیا ہے

خیبر پختونخوا میں قومی ذیلی پولیو مہم کوملتوی کرنے کا فیصلہ کیا گیا ہے،یہ فیصلہ التوا کا سیکیورٹی کی عدم دستیابی کے باعث ہوا ہے۔اعلامیہ کے مطابق کے پی حکومت نے پولیو مہم کے لیے سیکیورٹی فراہمی سے معذرت کی ہے،ضمنی بلدیاتی الیکشن کے باعث کے پی پولیس پولیو مہم کے لیے دستیاب نہیں ہے۔

ذرائع کے مطابق خیبر پختونخوا حکومت نے پولیو مہم ملتوی کرنے کا فیصلہ کیا ہے، ایڈیشنل چیف سیکریٹری نے کے پی پولیو پروگرام کو فیصلے سے آگاہ کر دیا،وفاق کو بھی خیبر پختونخوا حکومت نے پولیو مہم کے التوا بارے آگاہ کر دیا۔26 اضلاع میں شیڈول پولیو مہم کے پی حکومت کی درخواست پر ملتوی ہوئی ہے، ڈی آئی خان، لوئر دیر، مردان اور چارسدہ کی انتظامیہ نے پولیو مہم کے التوا کی درخواست کی تھی،29 اپریل سے خیبر پختونخوا میں ذیلی پولیو مہم شروع ہونا تھی، لیکن اب یہ 6 مئی سے شروع ہوگی، جبکہ صوبے میں ضمنی بلدیاتی الیکشن 28 اپریل کو ہوگا۔ذرائع کے مطابق ذیلی قومی انسداد پولیو مہم اسلام آباد اور چاروں صوبوں میں 29 اپریل تا 5 مئی شیڈول ہے، دیگر صوبوں میں مہم شیڈول کے تحت چلے گی۔