پاکستان تحریک انصاف پنجاب کے سابق میڈیا کوآرڈینیٹر جاوید بدر نے اعتراف کیا ہے کہ انہوں نے عمران خان کے ساتھ مل کر قوم کے بچوں کی غلط سیاسی تربیت کی۔
انہوں نے مسلم لیگ ن کے صدر نواز شریف کے نام کھلا خط لکھ کر ماضی میں کی گئی الزام تراشیوں پر معافی مانگی۔ جاوید بدر نے صدر مسلم لیگ ن کے نام لکھے کھلے خط میں کہا کہ نواز شریف سے اپنی گستاخیوں اور الزام تراشیوں پر معافی مانگتا ہوں، امید ہے میری غلطیوں کو جہالت اور نادانی سمجھ کر معاف کر دیں گے۔
سابق میڈیا کو آرڈینیٹر پی ٹی آئی نے کہا کہ بانی پی ٹی آئی کے ساتھ ملکر قوم کے بچوں کی غلط سیاسی تربیت کی، ان بچوں کے والدین اور پوری قوم سے بھی معافی مانگتا ہوں۔
سابق میڈیا کورآرڈینیٹر پی ٹی آئی نے اپنے خط میں اس بات کا اعتراف بھی کیا کہ ہم نے سیاست میں زہر، نوجوانوں کے ذہنوں میں انتشار بھرا، بانی پی ٹی آئی کو تب چھوڑا جب عثمان بزدار کو وزیراعلیٰ بنایا گیا اور جب بشریٰ بی بی کو کرپشن کی کھلی اجازت دی گئی۔
