خیبرپختونخوا میں تعلیمی امتحانات کا موسم ہے۔ ان دنوں چیئرمین پروفیسر جہانزیب مردان بورڈ کی جانب سے سوشل میڈیا پر مختلف بیانات اور ویڈیوز گردش کر رہی ہیں جن میں وہ نقل کو "تعلیم کا ناسور” قرار دیتے ہوئے اس کے خلاف اعلانِ جنگ کرتے دکھائی دیتے ہیں۔ ان کی یہ کوششیں قابلِ تحسین ضرور ہیں، لیکن ان کا انداز، الفاظ کا چناؤ اور پیشکش کا طریقہ کئی اہم سوالات کو جنم دیتا ہے۔
(ارسلان) کا واقعہ — ایک طالبعلم کی دیانتداری
امتحانات سے قبل ایک قابل طالبعلم، ارسلان، چیئرمین صاحب سے ملاقات کے لیے دفتر پہنچا۔ وہ کارٹلنگ کالج کا فرسٹ ایئر سٹوڈنٹ تھا۔ اس کا کہنا تھا کہ اس نے چیئرمین کی وہ تمام ویڈیوز دیکھی ہیں جس میں نقل کے خلاف سخت موقف اختیار کیا گیا۔ چیئرمین صاحب کی باتوں سے متاثر ہو کر وہ خود سے وعدہ کر چکا تھا کہ وہ نہ صرف نقل سے دور رہے گا بلکہ دوسروں کے لیے بھی مثال بنے گا۔ ملاقات کے دوران جذباتی منظر بھی دیکھنے کو ملا جب وہ چیئرمین سے بغلگیر ہو کر رو رہا تھا، گویا وہ امید لے کر آیا ہو کہ دیانتداری کی قدردانی کی جائے گی۔ چیئرمین صاحب نے بھی دلاسہ دیا، اسے سراہا اور عزم دہرایا کہ "اب کوئی نقل نہیں کرے گا، ہر طالبعلم اپنی محنت سے آگے جائے گا۔”
یہ لمحہ بظاہر ایک مثبت پیغام تھا، لیکن کچھ لوگوں کے نزدیک اس کا انداز، ماحول اور اسے میڈیا پر پیش کرنے کا طریقہ ناقدین کے لیے قابلِ اعتراض تھا۔
چیئرمین صاحب کی مہم — ارادہ مضبوط، انداز کمزور؟
چیئرمین مردان بورڈ نے جس سختی سے نقل کے خلاف آواز اٹھائی ہے، اس میں کوئی دو رائے نہیں کہ وہ اپنے مشن میں سنجیدہ ہیں۔ کئی مراکز پر کارروائیاں ہوئیں، جی ایچ ایس نوشہرہ خیشکی میں پیپر آؤٹ کے بعد فوری ایکشن لیا گیا، متعلقہ عملہ معطل ہوا۔ یہ سب اس بات کا ثبوت ہے کہ انہوں نے کمر کس لی ہے۔
لیکن سوشل میڈیا پر مسلسل سخت بیانات، اسکولوں کو لائسنس منسوخی کی دھمکیاں، اور بار بار کی گئی تنبیہات کا انداز ایسے وقت میں جب طلبہ ذہنی دباؤ میں ہوتے ہیں، کئی سوالات کھڑے کرتا ہے۔ نفسیاتی ماہرین کے مطابق امتحان سے پہلے خوف اور دباؤ کی کیفیت تعلیمی کارکردگی پر براہِ راست اثر ڈال سکتی ہے۔ طلبہ کو حوصلہ، اعتماد اور رہنمائی کی ضرورت ہوتی ہے، نہ کہ دھمکیوں سے لبریز پیغامات۔
سرکاری منصب کا وقار اور سوشل میڈیا پروٹوکول
چیئرمین صاحب کی حالیہ ویڈیوز میں ایک بات بار بار نوٹ کی گئی —وہ اپنے دفتر میں ایک نیم رسمی لباس (آدھی آستین کی ٹی شرٹ)، غیررسمی اندازِ نشست
میز پر جھک کر، ہاتھ باندھ کر بیٹھے ہیں، جو کہ ایک رسمی، باوقار طرزِ گفتگو کے برعکس انداز ہے۔
پس منظر میں قومی پرچم اور دفتر کی تختی موجود ہے۔ یہ تمام علامات اس بات کی طرف اشارہ کرتی ہیں کہ وہ ایک سرکاری منصب پر براجمان ہیں۔
ایسے میں جب وہ قوم سے مخاطب ہوں، خصوصاً تعلیم جیسے حساس شعبے میں، تو ضروری ہے کہ وہ اپنے لباس، انداز، زبان اور ماحول کا خیال رکھیں۔ کیونکہ سوشل میڈیا پر دیا گیا ہر پیغام صرف الفاظ ہی نہیں بلکہ مکمل تاثر چھوڑتا ہے۔ تعلیم کے شعبے میں موجود ایک ذمہ دار فرد سے یہ توقع کی جاتی ہے کہ وہ وقار، تمیز اور تہذیب کا پیکر ہو تاکہ طلبہ اور اساتذہ دونوں کو عملی رہنمائی حاصل ہو۔
اصلاحات کی اصل بنیاد — نقل سے پہلے نصاب، تدریس، اور تیاری
نقل صرف امتحان کے دن کا مسئلہ نہیں، بلکہ ایک مجموعی نظامی کمزوری کی علامت ہے۔ اگر تعلیمی ادارے، اساتذہ، اور طلبہ سال بھر تدریس، تربیت اور تیاری کے مراحل میں سنجیدہ ہوں تو نقل کی نوبت ہی نہ آئے۔ چیئرمین صاحب کی اصلاحی مہم کو مزید مؤثر بنانے کے لیے انہیں چاہیے کہ وہ سسٹم میں جڑ سے اصلاح کی کوشش کریں —
نقل کی وجوہات – کہاں ہے خرابی؟
سرکاری اسکولوں میں تعلیمی معیار کمزور ہے
اساتذہ کی تربیت ناکافی ہے
والدین کی عدم دلچسپی
سلیبس غیر معیاری اور ناقابلِ فہم
تعلیمی لیڈرشپ میں وژن کی کمی
حل کیا ہے؟
اساتذہ کی جدید تربیت
سلیبس کی سادہ اور مفید تشکیل
بچوں میں اعتماد پیدا کرنے والے پیغامات
سوشل میڈیا پر اصلاحی اور ہمدردانہ رویہ
والدین، اساتذہ اور طلباء کے درمیان بہتر ہم آہنگی
اگر ایجوکیشن کے اداروں کے سربراہان مسلسل میڈیا پر آ کر اپنی کارروائیوں، فیصلوں یا سزاؤں کے بارے میں بیانات دیتے ہیں، تو اس سے تعلیمی اداروں کی ساکھ متاثر ہو سکتی ہے۔ یہ ان کی ذاتی تشہیر کے طور پر دیکھا جا سکتا ہے اور اس کا اثر طلبہ، اساتذہ، اور تعلیمی نظام پر منفی پڑ سکتا ہے۔ اس لیے، ایجوکیشن کے شعبے کے رہنماؤں کو میڈیا کے استعمال میں احتیاط سے کام لینا چاہیے تاکہ ان کی توجہ صرف تعلیمی اصلاحات اور معیار کی بہتری پر مرکوز ہو، نہ کہ عوامی نمائش پر.
