کرک میں پاکستان تحریک انصاف کے کارکنوں نے اپنے ہی منتخب نمائندوں کے خلاف مبینہ کرپشن پر احتجاج کیا۔ مظاہرین نے صدام چوک سے ڈپٹی کمشنر آفس تک احتجاجی واک کیا اور بعد ازاں ڈپٹی کمشنر آفس کے سامنے احتجاجی مظاہرہ کیا ۔
کرک (ابرار خٹک) پاکستان تحریک انصاف کے کارکنوں نے اپنے ہی منتخب نمائندوں کے خلاف مبینہ کرپشن پر صدام چوک سے ڈپٹی کمشنر آفس تک احتجاجی واک کیا ، جس کے بعد ڈپٹی کمشنر آفس کے سامنے احتجاجی مظاہرہ کیا گیا ۔
احتجاج کی قیادت پی ٹی آئی کے سابق ایم پی اے گل صاحب خان نے کی، جبکہ مختلف سیاسی جماعتوں، سماجی تنظیموں اور شہریوں نے بھی بڑی تعداد میں شرکت کی ۔
احتجاجی مظاہرے سے خطاب کرتے ہوئے پی ٹی آئی کے سابق ایم پی اے گل صاحب خان نے کہا کہ نیب 15 روز کے اندر کرک آکر کیمپ آفس قائم کرے اور مبینہ کرپشن میں ملوث افراد، فرنٹ مینوں اور متعلقہ افسران کے خلاف کارروائی کرے، بصورت دیگر وہ نیب پشاور دفتر کے سامنے احتجاج کریں گے ۔
انہوں نے دعویٰ کیا کہ راتوں رات ٹی ایم او کو تبدیل کرکے صبح ٹینڈرز جاری کیے جاتے ہیں، ٹینڈرز من پسند افراد کو دیے جا رہے ہیں،موجودہ انکوائری ڈرامائی ہے اور ایک ہی ایجنسی سے اپنے خلاف انکوائری کرانا قابل قبول نہیں ۔
انہوں نے پی ٹی آئی کے کارکنوں سے بھی کرپشن کے خلاف آواز بلند کرنے کی اپیل کی،احتجاجی مظاہرے سے خٹک اتحاد کے صدر مدثر ایوب نے بھی خطاب کیا، انہوں نے کہا کہ ضلع بھر میں کرپشن جاری ہے، بانی پی ٹی آئی کا نعرہ کرپشن کے خلاف تھا لیکن پارٹی کے منتخب نمائندے کرپشن کر رہے ہیں ۔
