پشاور (حسن علی شاہ سے) خودمختار ساوی کی فلاحی ٹیم جمعرات کی صبح امدادی سامان کے ساتھ صوابی پہنچ گئی۔ اس سے پہلے بونیر اور سوات میں متاثرین کو امدادی اشیاء پہنچائی گئی تھیں۔ صوابی پہنچنے والے امدادی ٹرک کا شاندار استقبال کیا گیا جہاں بڑی تعداد میں متاثرین، مقامی عمائدین، ضلعی انتظامیہ، ریسکیو 1122 کا عملہ، پولیس اور مختلف سماجی شخصیات موجود تھیں۔ موقع پر امدادی اشیاء مستحقین میں شفاف طریقے سے تقسیم کی گئیں۔
خودمختار ساوی کی ٹیم میں خیبر ٹیلی ویژن پشاور کے اسٹیشن منیجر کامران جان، جی ایم پی آر او جمشید علی خان، آفتاب، وقار، ذیشان، انجینئر عماد اقبال زرین، رشید افاق، سلمان شیخ، فضل امین اور دیگر اسٹاف شامل تھے۔ امدادی سامان میں متاثرین کے لئے چٹائیاں، آشیانے، خوردنی گھی، چاول، دالیں، چائے، چینی، صابن، پانی کی بالٹیاں، گلاس، بجلی کا ضروری سامان اور دیگر اشیائے ضرورت شامل تھیں۔
اس موقع پر ڈی ایس پی، اسسٹنٹ کمشنر، ریسکیو انچارج، علاقہ عمائدین اور سیاسی و سماجی شخصیات نے خودمختار ساوی کی خدمات کو خراج تحسین پیش کیا۔ ان کا کہنا تھا کہ بونیر، سوات اور اب صوابی میں متاثرہ عوام کی بروقت امداد حقیقی خدمتِ انسانیت اور حقوق العباد کی روشن مثال ہے۔ یہ وہ کام ہے جو عوامی نمائندوں کی بنیادی ذمہ داری بنتی تھی لیکن خودمختار ساوی نے اس میں سبقت حاصل کی ہے۔
علاقہ عمائدین نے کہا کہ ہم خودمختار ساوی کی بروقت امداد پر دل سے شکرگزار ہیں۔ پشاور نیوز ڈیسک کے مطابق صوابی کے عمائدین محمد جان، قیصر خان، سابق ناظم سریر جدون، فیصل سواتی، مظفر اقبال، حاجی پرویز، ملک صمد، نثار خان، اویس شاہ، ادریس خان، نواب زادہ شہریار اور خانزادہ رئیس نے خودمختار ساوی کی خدمات کو اصل خدمتِ خلق قرار دیا۔ ان رہنماؤں نے کہا کہ اس وقت متاثرین کو خوردنی اشیاء، ادویات، صاف پانی اور خیموں کی اشد ضرورت ہے۔ خودمختار ساوی نے یہ ثابت کیا ہے کہ یہ ادارہ آج کے دور میں غریب اور لاچار افراد کے لئے بیت المال کی حیثیت رکھتا ہے۔
