خیبرپختونخوا میں حالیہ بارشوں کے باعث 10 افراد جاں بحق ہوگئے ہیں،جبکہ اس کے برعکس 14 افراد زخمی ہیں۔
خیبرپختونخوا میں حالیہ بارشوں سے مختلف حادثات ہوئے ہیں۔ ان حادثات میں 10 افراد جاں بحق جبکہ 14 افراد زخمی ہوگئے ہیں۔پی ڈی ایم اے کی طرف سے جاری اعداد وشمار کے مطابق حالیہ بارشوں کے نتیجے میں جاں بحق ہونے والے 10افراد میں6مرد،2 خواتین اور 2بچے شامل ہیں، زخمیوں میں5مرد،2خواتین اور7بچےشامل ہیں۔رپورٹ کے مطابق دیوار، چھتیں، آسمانی بجلی گرنے سے56گھروں کو شدید نقصان پہنچا ہے،51گھروں کوجزوی،5کومکمل نقصان پہنچا ہے۔ نقصان باجوڑ، سوات، مانسہرہ، بٹگرام، دیر، لوئرمالاکنڈ، لکی مروت میں ہوا۔ کوہاٹ، اورکزئی، شانگلہ، دیراپر،بونیر،چترال لوئر، نوشہرہ، مہمند بھی متاثرہ اضلاع میں شامل ہیں۔
پی ڈی ایم اے کے مطابق پی ڈی ایم اے، ضلعی انتظامیہ، ٹیمیں امدادی سرگرمیوں میں مصروف ہیں، بارش کی وجہ سے متاثرہ اضلاع میں بند شاہراہوں کو کھولا جارہا ہے۔ کسی بھی ناخوشگوارواقعہ کی اطلاع عوام فوری طور پر1700پردیں۔دوسری طرف آزاد کشمیر میں بارش اور برفباری مسلسل چوتھے روز بھی جاری ہے، جس سے نظام زندگی مفلوج ہوگئی ہے، وادی نیلم سمیت پہاڑی علاقوں میں بجلی اورموبائل سروس متاثر اور بجلی کی فراہمی معطل ہوگئی۔ بکوٹ، نمل، کوہالہ روڈ سلائیڈنگ کے باعث مختلف مقامات سے بند ہوگیا۔ انتظامیہ کی جانب سے سیاحوں کیلئے وادی نیلم سمیت دیگرعلاقوں کا سفرغیرموزوں قرار دیدیا۔ انتظامیہ نے ہدایت جاری کی ہے کہ بارش کے دوران سیاح پہاڑی علاقوں کےسفرسے گریز کریں۔ محکمہ موسمیات کے مطابق بارش کا سلسلہ اگلے دو روز تک جاری رہے گا۔
