خیبرپختونخوا میں دو مرحلوں پر مشتمل انسداد پولیو مہم کا آغاز کردیا گیا ہے۔
آج سے خیبرپختونخوا میں دو مرحلوں پر مشتمل انسداد پولیو مہم کا آغاز ہو گیا ہے۔اعلامیہ کے مطابق صوبائی وزیر صحت سید قاسم علی شاہ نے بچوں کو پولیو سے بچاو کے قطرے پلا کر صوبے میں پولیو مہم کا افتتاح کیا ہے۔اس حوالے سے بتایا جا رہا ہےکہ صوبہ بھر میں انسداد پولیو مہم کو دو مرحلوں میں چلایا جائے گا۔ پہلا مرحلہ 3 مئی تک جاری رہے گا جس میں 14 مکمل اضلاع اور 8 جزوی اضلاع میں انسداد پولیو مہم چلائی جارہی ہے۔جبکہ دوسرے مرحلے میں 2 مئی سے 6 مئی تک پانچ اضلاع میں انسداد پولیو مہم چلائی جائے گی۔
محکمہ صحت کے ذرائع کے مطابق دونوں مہمات کے دوران 44 لاکھ 23 ہزار سے زائد 5 سال سے کم عمر بچوں کو پولیو سے بچاو کے قطرے پلائے جائیں گے۔ان دو مرحلوں پر محیط انسداد پولیو مہم کیلئے 21 ہزار ٹیمیں اور 33 ہزار سیکیورٹی اہلکاروں کو تعینات کیا گیا ہے۔ واضح رہے کہ 2023 میں 4 جبکہ اس سال کوئی بھی پولیو کیس سامنے نہیں آیا۔صوبائِی وزیر صحت سید قاسم علی شاہ کے مطابق 5 سال سے کم عمر بچوں کے والدین سے خصوصی درخواست کی جاتی ہے کہ اپنے بچوں کو عمر بھر کی معذوری سے بچائیں اور بچوں کو پولیو جیسے موذی مرض سے بچاو کے لازمی پولیو کےقطرے پلائیں۔
