فتنہ الہندوستان کا دہشت گرد اور جعفر ایکسپریس حملے کا ماسٹر مائنڈ گل رحمان عرف استاد مرید افغانستان میں ہلاک ہو گیا۔
سکیورٹی ذرائع کے مطابق، گل رحمان عرف استاد مرید افغانستان کے صوبے ہلمند میں 17 ستمبر 2025 کو ہلاک ہوا۔ وہ جعفر ایکسپریس پر حملے کا ماسٹر مائنڈ تھا اور اس کا تعلق فتنہ الہندوستان سے تھا۔ بھارتی میڈیا اور سوشل میڈیا رپورٹس کے مطابق، گل رحمان کی ہلاکت افغان صوبے ہلمند میں ہوئی۔
ذرائع کے مطابق گل رحمان فتنہ الہندوستان کے مجید بریگیڈ کا ٹرینر اور آپریشنل کمانڈر تھا۔ وہ سکیورٹی فورسز، چینی شہریوں، معصوم شہریوں اور مختلف اداروں پر حملوں میں ملوث تھا۔ اس کے علاوہ، دہشت گرد گل رحمان نے پاکستان کے نہتے شہریوں، سکیورٹی فورسز اور سی پیک منصوبوں کو بھی نشانہ بنایا تھا۔
یاد رہے کہ رواں برس مارچ میں بلوچستان کے علاقے بولان میں جعفر ایکسپریس پر حملہ کیا گیا تھا جس میں 26 افراد شہید ہو گئے تھے۔ فورسز کی کارروائی میں 33 دہشت گرد ہلاک کر دیے گئے تھے اور 350 سے زائد یرغمالیوں کو بازیاب کرایا گیا تھا۔
