میرانشاہ میں پاک فوج کے زیر اہتمام شمالی وزیرستان کے قبائلی عمائدین، مشران اور معززین کا ایک اہم جرگہ منعقد کیا گیا۔ جرگے کے آغاز پر شمالی وزیرستان کے جی او سی نے شرکاء کا خیرمقدم کرتے ہوئے علاقے میں امن و خوشحالی کے قیام میں قبائلی قیادت کے کردار کو سراہا۔
اجلاس میں مقامی عوام اور ریاستی اداروں کے درمیان باہمی تعاون کو مزید مستحکم بنانے پر زور دیا گیا، جبکہ علاقے کی مجموعی سیکیورٹی صورتحال پر بھی تفصیلی تبادلہ خیال کیا گیا۔ شرکاء کو دہشت گرد عناصر کی جانب سے امن کو سبوتاژ کرنے کی کوششوں سے آگاہ کیا گیا۔
اس موقع پر پاک-افغان سرحدی صورتحال اور اس کے شمالی وزیرستان پر ممکنہ اثرات پر بھی گفتگو کی گئی۔ جرگے میں شریک قبائلی عمائدین نے اس عزم کا اعادہ کیا کہ علاقے میں پائیدار امن، برداشت، حب الوطنی اور قومی یکجہتی کے فروغ کے لیے مشترکہ کوششیں جاری رکھی جائیں گی۔
