پروونشل ڈیزاسٹر مینجمنٹ اتھارٹی (پی ڈی ایم اے) خیبرپختونخوا نے شدید مون سون بارشوں اور آندھی کے خدشے کے پیش نظر صوبے بھر میں ہائی الرٹ جاری کردیا ہے۔ الرٹ کے مطابق 22 اگست سے 26 اگست تک مختلف اضلاع میں موسمی شدت دیکھنے کو مل سکتی ہے۔
پی ڈی ایم اے کے اعلامیے میں کہا گیا ہے کہ ایبٹ آباد، مانسہرہ، سوات، چترال، دیر، مالاکنڈ، کوہستان، بونیر، پشاور، مردان، نوشہرہ، ڈیرہ اسماعیل خان اور وزیرستان میں موسلادھار بارشوں کے باعث سیلابی صورتحال پیدا ہونے کا امکان ہے۔ ادارے کے مطابق بارشوں کے نتیجے میں مقامی ندی نالوں، برساتی چشموں اور دریاؤں میں طغیانی آسکتی ہے، جبکہ پہاڑی علاقوں میں لینڈ سلائیڈنگ اور شہروں میں اربن فلڈنگ کا خطرہ بھی موجود ہے۔
شدید ہواؤں اور گرج چمک کے ساتھ بارش کے سبب کمزور مکانات، بجلی کے کھمبے، اشتہاری بورڈز اور سولر پینلز کو نقصان پہنچنے کا بھی خدشہ ظاہر کیا گیا ہے۔ اس سلسلے میں تمام ضلعی انتظامیہ اور متعلقہ اداروں کو ہدایت دی گئی ہے کہ وہ فوری حفاظتی اقدامات کریں، نکاسی آب کے نظام کو بہتر بنائیں اور مقامی آبادی کے ساتھ ساتھ سیاحوں اور مسافروں کو بروقت معلومات فراہم کریں۔
پی ڈی ایم اے نے کاشتکاروں اور مویشی پالنے والوں کو مشورہ دیا ہے کہ وہ اپنی فصلوں اور جانوروں کو محفوظ مقامات پر منتقل کریں تاکہ کسی بڑے نقصان سے بچا جا سکے۔ سیاحوں کو بھی متنبہ کیا گیا ہے کہ وہ خطرناک مقامات، خصوصاً پہاڑی اور ندی نالوں کے قریب جانے سے گریز کریں۔
مزید ہدایت میں کہا گیا ہے کہ ایمرجنسی سروسز، طبی امداد، خوراک اور دیگر ضروری اشیاء کی دستیابی یقینی بنانے کے لیے تمام متعلقہ ادارے الرٹ رہیں۔ عوام کو تاکید کی گئی ہے کہ وہ خراب موسم کے دوران غیر ضروری سفر سے پرہیز کریں۔
پی ڈی ایم اے نے واضح کیا ہے کہ اس کا ایمرجنسی آپریشن سنٹر 24 گھنٹے فعال ہے اور شہری کسی بھی ہنگامی صورتحال میں ہیلپ لائن 1700 پر فوری رابطہ کر سکتے ہیں۔
