محکمہ موسمیات نے 14 سے 17 جولائی کے دوران مون سون کی حالیہ لہر کے تحت پنجاب، خیبرپختونخوا اور سندھ کے مختلف علاقوں میں گرج چمک اور تیز ہواؤں کے ساتھ درمیانی سے شدید بارشوں کی پیش گوئی کی ہے۔
محکمہ موسمیات کے مطابق، ان ایام کے دوران کشمیر میں بارش کے ساتھ بعض مقامات پر موسلادھار بارش متوقع ہے، جبکہ گلگت بلتستان میں بھی گرج چمک کے ساتھ بارش کا امکان ظاہر کیا گیا ہے۔
خیبرپختونخوا میں بھی 14 سے 17 جولائی تک گرج چمک کے ساتھ بارش اور کچھ مقامات پر شدید بارشوں کا امکان ہے۔
پنجاب، اسلام آباد اور راولپنڈی میں پیر سے جمعرات تک مختلف مقامات پر تیز بارش اور گرج چمک کی پیشگوئی کی گئی ہے۔
اسی دوران سندھ کے کچھ اضلاع جیسے تھرپارکر، میرپور خاص اور شہید بے نظیر آباد میں 14 سے 16 جولائی کے درمیان وقفے وقفے سے تیز ہواؤں کے ساتھ بارش کا امکان ظاہر کیا گیا ہے۔
محکمہ موسمیات نے مری، گلیات، سوات، مانسہرہ، کوہستان اور گلگت بلتستان میں لینڈ سلائیڈنگ کا خدشہ بھی ظاہر کیا ہے اور سیاحوں و مسافروں کو غیر ضروری سفر سے گریز کرنے اور احتیاطی تدابیر اختیار کرنے کی ہدایت کی ہے۔
مزید برآں، شدید بارشوں کے باعث نشیبی علاقوں میں شہری سیلاب (اربن فلڈنگ) کا خطرہ ہے، جس کے پیش نظر تمام متعلقہ اداروں کو پیشگی اقدامات کرنے کی ہدایت جاری کر دی گئی ہے۔
