پاکستان میں محرم الحرام 1447ہجری کا چاند نظر آگیا، یکم محرم الحرام کل جمعے کو ہوگی جبکہ یوم عاشور 6 جولائی بروز اتوار کو ہوگا ۔
محرم الحرام کا چاند دیکھنے کے لیے مرکزی رویت ہلال کمیٹی کا اجلاس کوئٹہ میں کمیٹی کے چیئرمین مولانا عبدالخبیر آزاد کی زیر صدارت ہوا، اجلاس میں کمیٹی کے اراکین ،سپارکو اور محکمہ موسمیات کے حکام بھی موجود تھے ۔
اجلاس کے بعد مرکزی رویت ہلال کمیٹی کے چیئرمین مولانا عبدالخبیر آزاد نے محرم الحرام کا چاند نظر آنے کا اعلان کرتے ہوئے کہا کہ نارووال سمیت مختلف علاقوں سے چاند کی شہادتیں موصول ہوئی ہیں ۔
چیئرمین مرکزی رویت ہلال کمیٹی نے اعلان کیا کہ کل بروز جمعہ 27 جون کو ہجری سال کا پہلا دن یعنی یکم محرم الحرام ہوگا ۔
رویت ہلال کمیٹی کے چیئرمین کا کہنا تھا کہ 9 محرم الحرام 5 جولائی بروز ہفتہ اور یوم عاشور 10 محرم 6 جولائی بروز اتوار کو ہوگا ۔
