پشاور (حسن علی شاہ) — پشاور شہر اور اس کے نواحی علاقوں میں جاری موسلا دھار بارشوں اور گزشتہ روز آنے والے شدید زلزلے کے باعث دو اہم تاریخی عمارتیں منہدم ہو گئی ہیں۔ ڈھکی منور شاہ، نزد بازار قصہ خوانی میں واقع معروف اداکار پرتھوی راج کپور کی حویلی جبکہ چند قدم کے فاصلے پر یوسف خان المعروف دلیپ کمار کا آبائی گھر بھی زمین بوس ہو چکا ہے۔
یاد رہے کہ چند سال قبل خیبرپختونخوا حکومت نے ان دونوں تاریخی عمارتوں کو اپنی تحویل میں لے کر قومی ورثہ قرار دیا تھا، تاہم بروقت مرمت اور مناسب دیکھ بھال نہ ہونے کے باعث یہ عمارتیں بتدریج خستہ حال ہوتی گئیں۔
پرتھوی راج کپور کی حویلی اصل میں آٹھ منزلہ عمارت تھی، جو وقت گزرنے کے ساتھ سکڑ کر چار منزلہ رہ گئی تھی۔ دوسری جانب ڈونگہ گلی، محلہ خداداد میں واقع دلیپ کمار کا آبائی گھر تقریباً مکمل طور پر منہدم ہو چکا ہے۔
مزید برآں، اس گھر کے ارد گرد مارکیٹیں اور دکانیں قائم ہو چکی ہیں، جس کی وجہ سے یہاں تک رسائی انتہائی دشوار ہو گئی ہے۔ ماہرین کے مطابق ایسے حالات میں اس عمارت کی ازسرِ نو تعمیر یا اسے سیاحتی مقام کے طور پر بحال کرنا نہایت مشکل بلکہ قومی خزانے پر اضافی بوجھ ثابت ہو سکتا ہے۔
