مکہ مکرمہ میں نکاح کرنے والے شمالی وزیرستان سے تعلق رکھنے والے قومی کرکٹ ٹیم کے آل راؤنڈر محمد وسیم جونیئر کی شادی کی تقریبات کا آغاز اسلام آباد میں ہو گیا ۔
گزشتہ برس نکاح کے بندھن میں بندھنے والے 23 سالہ آل راؤنڈر اب اپنی دلہنیا کو گھر لانے کو تیار ہیں ، فوٹو اینڈ ویڈیو شیئرنگ پلیٹ فارم انسٹا گرام پر قومی کھلاڑی نے اپنی مہندی و ڈھولک کی خوبصورت تصاویر شیئر کر دیں جو دیکھتے ہی دیکھتے وائرل بھی ہو گئیں ۔
سوشل میڈیا پر کھلاڑی کی جانب سے شیئر کی گئیں تصاویر اور ویڈیوز میں محمد وسیم جونیئر مہندی کے اعتبار سے سبز کرتے پاجامے میں نظر آ رہے ہیں ،مختلف سوشل میڈیا پیجز پر وائرل ہونے والی تصاویر اور ویڈیوز سے معلوم ہوتا ہے کہ کھلاڑی کی دلہنیا کا نام اسماء ہے ۔
سوشل میڈیا پر تصاویر اور ویڈیوز منظر عام پر آنے کے بعد ساتھی کھلاڑیوں اور مداحوں کی جانب سے اس جوڑے کے لیے نیک تمناؤں اور مبارک باد کا سلسلہ شروع ہو گیا ہے ۔
محمد وسیم جونیئر اب تک 2 ٹیسٹ، 20 ون ڈے انٹرنیشنل اور 29 ٹی ٹوینٹی انٹرنیشنل میں قومی ٹیم کی نمائندگی کر چکے ہیں ۔
