پاکستانی سیکیورٹی اداروں کی موثر کارروائی، بھارتی سرپرستی میں جاسوسی میں ملوث افراد گرفتار

پاکستانی سیکیورٹی اداروں کی موثر کارروائی، بھارتی سرپرستی میں جاسوسی میں ملوث افراد گرفتار۔ تفصیلات کے مطابق پاکستان کے سیکیورٹی ادارے اندرونی و بیرونی خطرات سے نبرد آزما ہونے کے لئے دن رات مصروف عمل ہیں۔
تفصیلات کے مطابق پاکستان کے سیکیورٹی اداروں نے بھارتی خفیہ ایجنسی "را” کے لئے جاسوسی میں ملوث تین افراد کو گرفتار کر لیا۔ ان ملزمان کا تعلق نارووال، بہاولپور اور ضلع نیلم آزاد کشمیر سے ہے۔ ذرائع کے مطابق گرفتار افراد نے اعتراف کیا کہ انھیں مخصوص سوشل میڈیا ایپس پر خواتین اور رقم کا جھانسا دے کر حساس معلومات تک رسائی حاصل کی گئی۔ ملزمان کو رقوم ایزی پیسہ، کرپٹو والٹس اور بینک اکاؤنٹس کے ذریعے منتقل کی گئیں۔ گرفتار ملزمان نے تفتیش کے دوران اعتراف کیا کہ وہ بھارتی خفیہ ایجنسی "را” سے منسلک خواتین سے سوشل میڈیا کے ذریعہ مسلسل رابطہ میں تھے۔
ملزمان کے خلاف آفیشل سیکرٹ ایکٹ کے تحت مقدمہ درج کر کے قانونی کارروائی کے بعد سزائیں سنا دی گئیں۔ بھارت کا یہ پرانا وطیرہ ہے کہ معصوم شہریوں کو رقم کا جھانسا اور ہنی ٹریپ جیسی سرگرمیوں کے ذریعے مذموم مقاصد کے لیے استعمال کرتا ہے۔ دفاعی ماہرین کے مطابق اس سے قبل بھی بھارت کے حاضر سروس افسران کی جانب سے پاکستان میں جاسوسی اور حساس معلومات تک رسائی کے شواہد منظرِ عام پر آ چکے ہیں۔
عوام کو سوشل میڈیا کے استعمال میں دشمن کی انٹیلی جنس ایجنسیز کے حربوں سے محتاط رہنے کی اشد ضرورت ہے۔