پاکستان اور روس نے کراچی میں واقع پاکستان سٹیل ملز کی بحالی اور اسے جدید خطوط پر استوار کرنے کے پروٹوکول پر دستخط کر دیئے ۔
ماسکو: پاکستان اور روس کے درمیان پاکستان سٹیل ملز کی بحالی کا یہ معاہدہ ماسکو میں پاکستانی سفارت خانے میں طے پایا ۔
اس موقع پر پاکستان کی جانب سے سیکرٹری وزارت صنعت و پیداوار سیف انجم اور روس کی جانب سے انڈسٹریل انجینئرنگ ایل ایل سی کے جنرل ڈائریکٹر واديم ویلیچکو نے دستخط کیے ۔
دستخط کی تقریب کے موقع پر وزیراعظم کے معاون خصوصی ہارون اختر خان اور روس میں پاکستان کے سفیر محمد خالد جمالی بھی موجود تھے ۔
تقریب کے بعد گفتگو کرتے ہوئے ہارون اختر نے کہا کہ پاکستان سٹیل ملز کی بحالی وزیراعظم کے وژن کی عکاسی کرتی ہے، معاہدہ پاکستان سٹیل ملز کی ترقی اور صنعتی مستقبل کے لیے سنگ میل ہے ۔
