مشیر خزانہ خرم شہزاد نے کہا ہے کہ ملک میں پیٹرولیم مصنوعات کا وافر ذخیرہ موجود ہے اور تیل کی سپلائی کے حوالے سے کسی قسم کی تشویش کی ضرورت نہیں۔
ایک نجی خبر رساں ادارے کو دیے گئے انٹرویو میں انہوں نے بتایا کہ اس سے قبل ملک میں تقریباً 24 دن کا پیٹرولیم ذخیرہ موجود تھا، تاہم اب اس میں مزید چار دن کا اضافہ ہو چکا ہے، جس کے بعد مجموعی ذخیرہ چار ہفتوں تک پہنچ گیا ہے۔
انہوں نے کہا کہ حکومت کی کوشش ہے کہ تیل کے ذخائر میں مزید اضافہ کیا جائے تاکہ کسی بھی ہنگامی صورتحال سے مؤثر انداز میں نمٹا جا سکے۔
خرم شہزاد کا کہنا تھا کہ ملک میں پیٹرولیم مصنوعات کی دستیابی تسلی بخش ہے اور آئندہ دنوں میں اس میں مزید بہتری آئے گی۔
انہوں نے مزید بتایا کہ غیر ضروری اخراجات میں کمی کے باعث قومی خزانے کو 125 ارب روپے کا فائدہ ہوا ہے، جبکہ حکومت نے کفایت شعاری کے حوالے سے ایک نیا ریکارڈ بھی قائم کیا ہے۔
