پشاور: خیبر پختونخوا سے افغان مہاجرین کی واپسی کا سلسلہ جاری ہے، دوسرے مرحلے کے تحت آج 727 افغان سیٹزن کارڈ رکھنے والے مہاجرین اور 1571 غیر قانونی تارکین وطن کو طورخم بارڈر کے راستے افغانستان بھیجا گیا۔
محکمہ داخلہ و قبائلی امور خیبر پختونخوا کے مطابق دوسرے مرحلے میں مجموعی طور پر 27,728 افغان سیٹزن کارڈ ہولڈرز اور 18,516 غیر قانونی تارکین وطن کو افغانستان روانہ کیا گیا، جس کے تحت 46,244 افراد کو ملک بدر کیا گیا۔
سرکاری اعداد و شمار کے مطابق خیبر پختونخوا سے 7,426، اسلام آباد سے 2,137، پنجاب سے 17,493، گلگت سے 2، آزاد کشمیر سے 1,168 اور سندھ سے 44 افراد کو افغانستان واپس بھیجا گیا۔
رپورٹ کے مطابق 19,056 افغان مہاجرین نے رضاکارانہ طور پر وطن واپسی کا انتخاب کیا اور طورخم سرحد کے ذریعے افغانستان روانہ ہوئے۔
ستمبر 2023 سے اب تک خیبر پختونخوا کی مختلف سرحدوں سے مجموعی طور پر 5 لاکھ 20 ہزار 447 افغان شہریوں کو واپس افغانستان بھیجا جا چکا ہے۔
