نائب وزیر اعظم اور وزیر خارجہ اسحاق ڈار نے کہا ہے کہ آبنائے ہرمز سے پاکستانی پرچم بردار مزید بیس جہازوں کو گزرنے کی اجازت مل گئی ہے، جبکہ روزانہ کی بنیاد پر دو جہاز اس اہم بحری گزرگاہ کو عبور کریں گے۔
اپنے ایک بیان میں اسحاق ڈار نے کہا کہ ایران کی جانب سے یہ اقدام نہایت مثبت اور تعمیری ہے، جس کی تعریف کی جانی چاہیے۔ ان کا کہنا تھا کہ یہ پیش رفت خطے میں امن اور استحکام کے قیام کے لیے ایک اہم قدم ہے۔
انہوں نے مزید کہا کہ اس طرح کے اقدامات نہ صرف کشیدگی میں کمی لاتے ہیں بلکہ خطے میں اجتماعی کوششوں کو بھی مضبوط بناتے ہیں، جو پائیدار امن کے لیے ضروری ہیں۔
نائب وزیر اعظم کا کہنا تھا کہ مذاکرات، سفارتکاری اور اعتماد سازی ہی وہ واحد راستہ ہے جس کے ذریعے مسائل کو حل کیا جا سکتا ہے اور خطے کو عدم استحکام سے نکالا جا سکتا ہے۔
انہوں نے اس امید کا اظہار بھی کیا کہ اس طرح کے مثبت اقدامات مستقبل میں مزید پیش رفت کا باعث بنیں گے اور خطے میں دیرپا امن کی راہ ہموار کریں گے۔
