اسلام آباد: پاکستان میں سری لنکا کے ہائی کمشنر ریئر ایڈمرل (ر) فرڈ سینی ویراتنے نے وفاقی وزیر برائے انفارمیشن ٹیکنالوجی و ٹیلی کمیونیکیشن شزہ فاطمہ خواجہ سے ملاقات کی۔
ملاقات کے دوران دونوں فریقین نے دیرینہ، پائیدار اور جدت پر مبنی دوستانہ تعلقات کا اعادہ کیا.
دونوں فریقین نے آئی ٹی و ٹیلی کام کے شعبوں میں دوطرفہ تعاون مزید مضبوط بنانے کے عزم کا اظہار کیا۔
دونوں رہنماؤں نے ٹیکنالوجی صنعتوں کے درمیان مشترکہ کاروباری شراکت داریوں (JOINT VENTURES) کے ذریعے کاروباری حجم بڑھانے اور بین الاقوامی منڈیوں میں نئے مواقع تلاش کرنے پر تبادلہ خیال کیا۔
گفتگو میں مصنوعی ذہانت، سائبر سکیورٹی، آئی ٹی اور آئی ٹی سے منسلک خدمات، ڈیجیٹل ٹرانسفارمیشن، فن ٹیک، اسٹارٹ اپس اور ڈیجیٹل مہارتوں کی ترقی سمیت مختلف شعبے زیر بحث آئے۔
ملاقات میں آئی ٹی شعبوں کے درمیان ادارہ جاتی روابط مضبوط بنانے کے لیے مشترکہ ورکنگ گروپ تشکیل دینے کی تجویز پیش کی گئی.
جس کے تحت بزنس ٹو بزنس تبادلوں، ٹیکنالوجی روڈ شوز، اسٹارٹ اپ لنکیجز، فن ٹیک تعاون اور کمپنیوں کے درمیان شراکت داریوں کو فروغ دیا جائے گا۔
دونوں ممالک نے ٹیکنالوجی کے شعبے میں باہمی مفاد پر مبنی تعاون کو مزید گہرا کرنے کے لیے مسلسل رابطہ برقرار رکھنے پر اتفاق کیا۔
