راولپنڈی: پاکستان نے فتح سیریز کے زمین سے زمین پر مار کرنے والے میزائل کا کامیاب تربیتی تجربہ کیا ہے،آئی ایس پی آر کے مطابق میزائل کی رینج 120 کلومیٹر ہے اور یہ تجربہ جاری مشق انڈس کا حصہ تھا ۔
تربیتی تجربے کا مقصد افواج کی عملی تیاری کو یقینی بنانا اور میزائل کے جدید نیویگیشن سسٹم سمیت اس کی تکنیکی صلاحیتوں اور درستگی کو جانچنا تھا۔
یہ تجربہ پاک فوج کے سینیئر افسران کے ساتھ ساتھ پاکستان کے سٹریٹجک اداروں کے سائنسدانوں اور انجینئروں نے بھی ملاحظہ کیا ۔
پاکستان آرمی کے سینئر افسران کے علاوہ پاکستان کی سٹریٹجک تنظیموں کے افسران، سائنسدانوں اور انجینئرز نے تربیتی تجربے کا مشاہدہ کیا ۔
دوسری جانب چیئرمین جوائنٹ چیفس آف سٹاف کمیٹی اور چیف آف آرمی سٹاف نے حصہ لینے والے فوجیوں، سائنسدانوں اور انجینئرز کو کامیاب تجربہ پر مبارکباد دی ۔
آئی ایس پی آر نے کہا کہ پاکستان کی علاقائی سالمیت کے خلاف کسی بھی جارحیت کو ناکام بنانے کیلئے پاک فوج کی آپریشنل تیاریوں اور تکنیکی مہارت پر مکمل اعتماد کا اظہار کیا گیا ہے، پاک فوج دشمن کی کسی بھی جارحیت کا بھرپور جواب دینے کی صلاحیت رکھتی ہے ۔
صدر مملکت آصف علی زرداری اور وزیراعظم شہباز شریف نے فتح میزائل کے کامیاب تجربہ پر سائنسدانوں، انجینئروں اور قوم کو مبارکباد دی۔ صدر مملکت اور وزیراعظم نے ملکی دفاع کو مضبوط بنانے کیلئے سیکورٹی فورسز، سائنسدانوں اور انجینئروں کی کاوشوں کو سراہتے ہوئے ملکی سلامتی اور دفاع یقینی بنانے کے قومی عزم کا اعادہ کیا ۔
علاوہ ازیں وفاقی وزیرداخلہ محسن نقوی نے بھی الفتح میزائل کے کامیاب تجربے پر سائنسدانوں، انجینئروں اور عسکری قیادت کو مبارکباد دیتے ہوئے کہا ہے کہ پاکستان کے سٹرٹیجک اداروں اور سکیورٹی فورسز کی بدولت پاکستان کا دفاع ناقابل تسخیر ہے ۔
