نائب وزیراعظم و وزیر خارجہ اسحاق ڈار کا ازبکستان کے وزیر خارجہ بختیار سعیدوف سے ٹیلیفونک رابطہ ہوا، جس میں دونوں رہنماؤں نے ازبکستان، افغانستان اور پاکستان کو جوڑنے والے ریلوے منصوبے پر تفصیلی تبادلہ خیال کیا۔
ترجمان دفتر خارجہ کے مطابق اتوار کے روز ہونے والی اس گفتگو میں ریلوے منصوبے کے فریم ورک ایگریمنٹ پر بھی بات چیت کی گئی، جو خطے میں رابطوں کے فروغ کے لیے اہم قدم تصور کیا جا رہا ہے۔
دونوں وزرائے خارجہ نے آئندہ ملاقات کے لیے چین کے شہر تیانجن میں ہونے والے شنگھائی تعاون تنظیم (SCO) کے وزرائے خارجہ کونسل اجلاس کے موقع کو موزوں قرار دیتے ہوئے دوبارہ ملاقات پر اتفاق کیا۔
واضح رہے کہ شنگھائی تعاون تنظیم کے وزرائے خارجہ کا اجلاس 15 جولائی کو تیانجن، چین میں منعقد ہوگا۔ چینی وزارت خارجہ کے مطابق اجلاس میں رکن ممالک کے وزرائے خارجہ کے ساتھ ساتھ ایس سی او کے مستقل اداروں کے سربراہان بھی شرکت کریں گے۔
یہ اجلاس کمیونسٹ پارٹی آف چائنا کی مرکزی کمیٹی کے پولیٹیکل بیورو کے رکن اور چینی وزیر خارجہ وانگ ای کی دعوت پر ہو رہا ہے، جس میں رکن ممالک مختلف شعبوں میں تعاون اور بین الاقوامی و علاقائی امور پر تبادلہ خیال کریں گے۔
