وزیراعظم شہباز شریف نے کہا ہے کہ قدرت نے پاکستان کو بے شمار معدنی وسائل سے نوازا ہے، جن کی مالیت کھربوں ڈالر ہے اور یہ خزانے ملک کے پہاڑوں کے اندر چھپے ہوئے ہیں۔ انہوں نے کہا کہ دہشت گرد پاکستان کو ان وسائل سے فائدہ اٹھانے سے روکنے کی سازش کر رہے ہیں۔
اسلام آباد میں "رب ذوالجلال کا احسان پاکستان” تقریب سے خطاب کرتے ہوئے وزیراعظم نے کہا کہ پاکستان اللہ تعالیٰ کا عظیم تحفہ ہے، جو ماہ رمضان میں عطا کیا گیا۔ انہوں نے کہا کہ قیام پاکستان کسی معجزے سے کم نہیں تھا، اور یہ ہماری ذمہ داری ہے کہ اس کی قدر کریں۔
وزیراعظم نے کہا کہ پوری قوم اتحاد کا مطالبہ کر رہی ہے، جبکہ دہشت گردی کے خاتمے کے لیے افواج پاکستان بے شمار قربانیاں دے رہی ہیں۔ اگر ملک میں تفریق اور مذہبی منافرت کو ہوا دی گئی تو یہ ان قربانیوں کے ساتھ بے وفائی ہوگی۔ انہوں نے خبردار کیا کہ اگر ہم نے اپنی ذمہ داری نہ نبھائی تو آنے والی نسلیں ہمیں معاف نہیں کریں گی۔
شہباز شریف نے کہا کہ پاکستان کے وسیع تر مفاد کے لیے ہمیں اپنے ذاتی مفادات اور انا کو پس پشت ڈالنا ہوگا۔ انہوں نے کہا کہ دہشت گردوں کا ایک ہی مقصد ہے کہ پاکستان قدرتی وسائل سے استفادہ نہ کرسکے۔ ہمیں معلوم ہے کہ دہشت گردوں کو مالی معاونت کہاں سے مل رہی ہے اور ان کے تانے بانے کہاں تک پھیلے ہوئے ہیں۔
انہوں نے کہا کہ پاکستان کی ترقی اور خوشحالی بعض عناصر کو برداشت نہیں، یہی لوگ دراصل پاکستان کے دشمن ہیں۔ وزیراعظم نے افواج پاکستان اور قانون نافذ کرنے والے اداروں کی قربانیوں کو سراہتے ہوئے کہا کہ قومی اتحاد اور یکجہتی ہی ترقی کا واحد راستہ ہے۔ اگر ہم متحد ہو جائیں تو پاکستان عالمی سطح پر اپنا مقام حاصل کر سکتا ہے۔
