ایران کے صدرچند روز بعد پاکستان کا دورہ کریں گے

پاک ایران تعلقات میں بڑی پیشرفت ،ایران کے صدر ابراہیم رئیسی چند روز بعد پاکستان کا دورہ کریں گے

ایران کے صدر ابراہیم رئیسی پہلے غیر ملکی سربراہ حکومت ہوں گے جو موجودہ پاکستانی حکومت کے برسر اقتدار آنے کے بعد پاکستان کا دورہ کریں گے۔سفارتی ذرائع کے مطابق ایرانی صدر 22اپریل کو وفد کے ساتھ پاکستان پہنچیں گے۔ ایرانی صدرکے دورہ پاکستان کیلئے دونوں ممالک کے حکام کے درمیان بنیادی امور طے پا چکے ہیں۔ذرائع کا بتانا ہے کہ ایرانی صدر دورہ پاکستان میں صدر آصف علی زرداری، وزیراعظم شہباز شریف اور عسکری قیادت سے ملاقاتیں کریں گے۔

ذرائع کا کہنا ہے کہ ایرانی صدر کے دورہ پاکستان کے دوران دو طرفہ امور اور پاک ایران گیس پائپ لائن سمیت مشرق وسطی کی بدلتی ہوئی صورتحال پر بھی تبادلہ خیال کیا جائے گا۔یاد رہے کہ ایران نے جنوری 2024میں پاکستان کے صوبے بلوچستان کے سرحدی علاقے میں میزائل حملے کیے تھے ۔جس کے جواب میں پاکستان نے بھی ایران کے صوبے سیستان میں بی ایل اے کے دہشتگردوں کے ٹھکانوں کو نشانہ بنایا تھا۔تاہم دونوں جانب سے سفارتی چینل کے ذریعے معاملات کو خوش اصلوبی سے حل کیا گیا اور اس واقعے کے فوری بعد ایران کے وزیر خارجہ نے بھی پاکستان کا دورہ کیا۔