وزیرِ اعظم شہباز شریف نے معرکہ حق کے دوران آپریشن بُنیان مرصوص کی فرنٹ لائن چھاؤنی سیالکوٹ کا دورہ کیا ہے، وزیراعظم نے کہا ہے کہ بھارت کو جھوٹے دعوے اور تکبر کا کرارا جواب ملا ۔
آئی ایس پی آر کے مطابق وزیرِاعظم شہباز شریف نے پسرور چھاؤنی کے دورے کے موقع پر معرکہ حق کے دوران آپریشن بنیان مرصوص کی فرنٹ لائنز پر افسران و جوانوں سے ملاقاتیں کیں ۔
نائب وزیرِ اعظم و وزیرِ خارجہ محمد اسحٰق ڈار، وزیر دفاع خواجہ آصف، آرمی چیف جنرل سید عاصم منیر اور ایئر چیف مارشل ظہیر احمد بابر سدھو، وفاقی وزرا احسن اقبال، عطا اللہ تارڑ، کور کمانڈر سیالکوٹ بھی وزیراعظم کے ہمراہ تھے ۔
وزیراعظم کو آپریشن کی تفصیلات اور تیاریوں پر بریفنگ دی گئی، وزیراعظم نے آپریشن بنیانِ مرصوص میں افواجِ پاکستان کی کارکردگی کو سراہا اور کہا کہ قوم کو اپنے بہادر سپاہیوں پر فخر ہے، افواج پاکستان نے دشمن کے حملے کو چند گھنٹوں میں ناکام بنایا ۔
انہوں نے کہا کہ دشمن نے نہتے شہریوں، بچوں اور خواتین کو نشانہ بنایا، بھارت کی جارحیت بے بنیاد اور عالمی قوانین کی کھلم کھلا خلاف ورزی ہے ۔
وزیراعظم شہباز شریف نے کہا کہ بھارت کو جھوٹے دعوے اور تکبر کا کرارا جواب ملا ،وزیر اعظم آئندہ چند روز کے دوران پاک فضائیہ،پاک بحریہ کے افسران و جوانوں سے ملاقات کے لیے ائیر بیسز اور نیول بیسز کا بھی دورہ کریں گے ۔
