امریکی نائب صدر جے ڈی وینس نے کہا ہے کہ لبنان میں جنگ بندی کے عمل میں شامل ہونے کی کوئی واضح ضمانت نہیں دی گئی، اور اگر ایران اس معاملے پر مذاکرات کو ناکام بنانا چاہتا ہے تو یہ اس کا اپنا فیصلہ ہوگا۔
میڈیا سے گفتگو کرتے ہوئے نائب صدر نے وضاحت کی کہ جنگ بندی کے معاہدے اکثر مشکلات کا شکار رہتے ہیں، اس لیے تمام فریقین کو سنجیدگی سے اقدامات کرنے کی ضرورت ہے۔
انہوں نے مزید کہا کہ ایران کی جانب سے پیش کیا گیا پہلا دس نکاتی منصوبہ مسترد کر دیا گیا تھا، جبکہ اب دوسرے دس نکاتی منصوبے پر ایران اور پاکستان کے ساتھ بات چیت جاری ہے۔
جے ڈی وینس نے یہ بھی دعویٰ کیا کہ نیویارک ٹائمز اور ایران میں بعض حلقے غلط معلومات پر مبنی دس نکات پیش کر رہے ہیں، جو حقائق کے برعکس ہیں۔
نائب صدر نے زور دیا کہ اب ایرانی حکومت کو اگلا قدم اٹھانا ہوگا۔ ان کے مطابق ایران جو پیشکش کرے گا، اس کے بدلے میں اسے بھی فائدہ حاصل ہوگا۔ انہوں نے کہا کہ پابندیوں میں نرمی پر بات کی جا سکتی ہے، لیکن ایران کو یورینیم کی افزودگی روکنا ہوگی۔
