وزیر اعظم شہباز شریف نے ایران کے صدر پزشکیان سے ٹیلی فون پر رابطہ کیا، اس موقع پر وزیراعظم نے مذاکرات اور سفارت کاری کے ذریعے امن کی بحالی کی اہمیت پر زور دیا ۔
اسلام آباد: ایرانی صدر سے گفتگو کرتے ہوئے وزیراعظم شہباز شریف نے کہا کہ پاکستان مشرقِ وسطیٰ میں تیزی سے ابھرتی ہوئی صورتحال پر مستقل طور پر نظر رکھے ہوئے ہے ۔
وزیراعظم نے اقوام متحدہ کی سلامتی کونسل اور او آئی سی سمیت تمام سفارتی فورمز پر ایران کے لیے پاکستان کی حمایت کا اعادہ کیا ۔
وزیراعظم شہبازشریف نے تمام فریقین سے بین الاقوامی قانون اور اقوام متحدہ کے چارٹر کے اصولوں کی پاسداری پر زور دیا ۔
اس موقع پر ایرانی صدر پزشکیان نے حالیہ کشیدگی کے دوران پاکستان کی مستقل اور اصولی حمایت پر وزیراعظم کا شکریہ ادا کیا ۔
ایرانی صدر ڈاکٹر پزشکیان نے تنازع کے پُرامن حل کو فروغ دینے میں پاکستان کے تعمیری کردار کا بھی اعتراف کیا ۔
اس موقع پر دونوں رہنماؤں نے اس مشکل ترین وقت میں امت کے درمیان اتحاد کی اہمیت پر اور آپس میں رابطے میں رہنے پر اتفاق کیا ۔
